Kumin fur ruahtui tla a tlem tak deuh avangin Bairabi leh Sairang inkara rel kawng km 51.25-a thui, Contractor hrang hrangin an siam mek chu ngawrh taka chhunzawm \an leh a ni. Railway hotute hnen a\anga ZONET thu dawn danin fur ruahtui tlak nasat lai khan hna thawh theih a nih loh avangin ngawrh takin lei verh a ni a, he rel kawngin a pal tlang tur hmun 23-a lei verh tlang ngai chu verh zawh vek a ni a, tunah hian lei verha rel a tlan tlang theih nana lei verh chhuat, concrete-a chhun te, a sir tawn tawna tuihawk luankawr siam te, a sir leh chung lam tichak tura concrete bang siam te thawh mek a ni a, lei verh laia hnathawh tur awm zawng zawng zo fel turin tunah hian hmabak za zela 25 vel an la nei a ni. Rel kawng kalna tur lei laih leh rel station siamna tur hmuna lei laih pawh za zela 65 vel zawh fel a ni tawh a, rel kawng siamna tura mimal ram lak, chin fel tawh chu za zela 89 a ni tawh a, tunah hian hmabak za zela 11 a la awm a ni. He rel kawng siam mekah hian Bairabi a\anga Sairang thlengin rel station 4 siam tur a ni a, chungte chu Hortoki, Kawngpui, Mualkhang leh Sairangah te a ni a, Bairabi a\anga Sairang thlenga rel kawng siam mekah hian lei verh 23 awm zinga a sei ber chu Bairabi bula mi km 1 leh metre 800 vela sei a ni a, he hna hi Naik Infra. Project Ltd.-in a thawk a ni. A dawttu, Sairang bula mi chu km 1 leh metre 280-a sei a ni a, he hna hi Vishakapatnam-a Hqrs. nei, SSNR Project-in a thawk a ni. He rel kawng siam mekah hian lei lian leh sang pui pui 44 dawh tur leh lei te deuh dawh tur 98 a awm bawk a, lei dawh tur zawng zawng sei zawng belhkhawm hi km 7 leh metre 27 a ni a, leiverh 23 sei zawng belhkhawm hi km 9 leh metre 9 a ni. Bairabi leh Sairang inkara Rel kawng siamna atana kum 2008-09 a sum ruahman hi a vaiin cheng vaibelchhe 2,384 leh nuai 33 a ni a, hei hi ennawnin Revised Estimate, cheng vaibelchhe 4000 siam a ni tawh a, rel kawng siam nan kumin March thla tawp thlenga sum hman tawh zat chu cheng vaibelchhe 1,234 a ni a, hman theiha zawh fel hun tur chu kum 2020 March thla a ni.
