India rama thubuai ngaihven hlawh ber pakhat, kum 25 kal ta, 1992 December ni 6-a Ayodhya-a Ram Janambhoomi-Babri Masjid tihchhiat a nih chungchang chu vawiin khan Supreme Court Special Bench-in a ngaihtuah a, kum thar February ni 8-a ngaihtuah chhunzawm atan a dah leh ta a ni. Hemi chungchang ngaihtuahtu bench-ah hian Chief Justice Dipak Misra, Justice Ashok Bhushan leh Abdul Nazeer an tel a, Ram Janambhoomi Nyas ukil, Harish Salve-a chuan hemi chungchang ngaihtuah tura bench lian zawk, Judge tam zawk telna din chu \ul a tih loh thu sawiin, court sang ber hi court pawn lam politics thilin tibuai lo se a duh thu a sawi a, Sunni Waqf Board aiawh, Kapil Sibal, Rajeev Dhawan leh Dushyant Dave chuan, he thubuai hian India rama sakhaw hrang hrang dinhmun a nghawng phak avangin, court hi a fimkhur hle a ngai tih sawiin, bench lian zawk, Judge tam zawk telna din an sawi mawi thung a, Pu Sibal-a chuan, Ram Temple sak chu kum 2014 Lok Sabha inthlana BJP manifesto-ah a tel tih a sawi bawk. Pu Kapil Sibal-a chuan, hemi chungchangah hian thubuaiah pawh tel lo, Subramanian Swamy-a thu thlen pawm a ni chu mak a tih thu a sawi a, Supreme Court-in Ram Janambhoomi-Babri Masjid thubuai a ngaihtuah lai hian, Ayodhya-ah Ram temple sakna lam hawi, sakhaw serh leh sang buatsaih a ni.
Chanchin Thar Ayodhya thubuai SC Special Bench-in ngaihtuah
