Pawikhawihtu hi Rugby khel thiam Rawan Baxter a ni a, a nupui leh a fate a hal hlum rual hian amah pawh a invit hlum ve nghal nia hriat a ni a, thil thlen dan hi finfiah tum mek a nih thu Police te chuan an sawi a, hetihrual hian an chhungkua-ah hian tharum thawhna a lo thleng fo tawh tih erawh an nemnghet thung a, nu ber hi kum 31 mi Hannah Baxter-i a ni a, a fa te pathum nen car chhungah hian hal hlum an ni.
Queensland police te chuan nu ber leh a fate pathum thah an nih thu hi an puang a, an pa Baxter-a thih danah midang kutthlak anih theihna awm a awm lo tih chin an puangzar rih a ni.
Nilaini khan police te chuan phone call an dawn bawhzuiin pawikhawihna hmun hi an thleng a, a hmun an thlen hian kum 6 mi Laianah, kum 4 mi Aaliyah leh kum 3 mi Trey te chu car chhungah thi-in an hmu a, an nu ber Hannah Baxter-i chu car pawnah na taka kang hliamin an hmu a ni. Hannah Baxter-i hi damdawi inah hruai nghal ni mahse, a taksa a kan nasat avangin a thi zui ve leh a ni. A bulhnaia lo awmte chuan Hannah Baxter-i hi ‘Petrol in min leih tih leh, ka fate kha chhan ru’ tiin a au chhuak tih an sawi. Pawikhawihtu kum 42 mi Baxter-a chuan a bulhnaia lo awm ve, inrawlh tumte chu a lo dang tih an sawi a, car chhunga chemte chu la in amah leh amah a invit hlum zui tih an sawi.
