Aizawl North III bialtu MLA, Pu C. Lalmuanpuia private member’s resolutuion putluh hi ‘MNF Sorkar-in kum 2008-a District thar 3 Khawzawl, Saitual leh Hnahthial District-a hawn te, kum 10 lai hlamchhiah an nih hnuah Sorkar-in tihlawhtling tura chak taka hma a la hi lawmawm kan ti hle’ tih a ni.
Resolution pharh paha thusawiin, Pu C. Lalmuanpuia chuan, Mizoram puma District pathum chauh awm \hin chu kum 1996 a\ang khan District tam zawka \hendarh rawtna a awm \an tih a sawi a. Hemi atan rawtna hrang hrang awmte chu ngaihtuah ni \hin mah se, a hlawhtling mai lova, khatih laia congress sorkar chuan rawtna hrang hrang awmte ngaihtuahin District thar siam chu a bawhzui ve reng a, hun engemaw chen a kal hnuah Aizawl District chu District 3 Aizawl, Aizawl East leh Aizawl West District-ahte \hen niin, Aizawl District Headquarters chu Aizawl a ni a, Aizawl East chu Champhai leh Aizawl West District Headquarters chu Mamit a ni a, hemi hnu kum 1998 khan rawtna hran siam lehin, Aizawl North leh Aizawl South District-te siam belh leh a ni a, Aizawl North District Headquarters atan Kolasib leh Aizawl South District Headquarters atan Serchhip ruat a ni a, hemi rual hian Chhimtuipui District chu Chhimtuipui East leh Chhimtuipui West-ah \hen a ni bawk a, Saiha leh Lawngtlai chu District Headquarters atan ruat nghal a ni, a ti.
Pu C. Lalmuanpuia chuan, hetianga District thar 5 ngawt siam belh a nih \um hian District Headquarters hmuh beisei ve Khawzawl, Saitual leh Hnahthial-te chu District Headquarters pek an nih ve tak loh avangin an lungawi lo hle a, Khawzawlah phei chuan motor kawngpui dan a nih bakah sorkar pisa engemawzat suasam a ni, a ti a. An duhna hi hriaiin MNF kaihhruai sorkar chuan kum 2008 September ni 1 khan Khawzawl, Saitual leh Hnahthial-te chu District thar pek a remti ta a, hemi hnu hian MNF sorkar chu a tlak tak avangin a tihlawhtling hman ta lova, Congress Party-in kum 10 chhung thuneihna an chan chhunga an bawhzui bawk si loh avangin tun dinhmun hi an thleng ta a ni, a ti a. Nikuma Assembly inthlanpui neih dawn khan MNF Party chuan District 3 a lo puan tawh chu tihhlawhtlin a nih tur thu sawiin, hei hi Manifesto-ah pawh an telh a, MNF kaihhruai sorkar thar chuan kumin March thlaa Vote on Account hmanga thla 4 chhunga sorkar sum hman tur ruahman lailawk a pharhah District tihpuitlinna tur Rs. nuai 150 \heuh a dah nghal a, tun thla ni 3 khan Notification tichhuakin DC Office leh SP Office dinna tur hriattirna pawh a tichhuak ta a ni, a ti a. Hetianga sorkar hmasain kum 10 chhung zet a lo hlamchhiah tawh MNF sorkar-in a tihlawhtling tura chak taka hma a la nghal chu lawmawm a tih thu sawiin, a resolution chu pawmpui turin member-te a sawm a ni.
Hemi hnu hian Resolution hi member ten an sawi zui nghal a, Congress Group Leader, Pu Zodintluanga chuan Congress sorkar-in kum 1998-a District thar a siam kha chuan a huam chin tur bithlaiah fel nghal vek a ni, a ti a. Tuna MNF-in District thar 3 siam tur a tih hi chu a huam chin tur pakhat mah siam ala nih loh avangin harsatna tam tak la thleng thei a nih avangin tuna lawmthu lo sawi lawk chu la hma mah mah a ni a ti a. Chief Minister-in a lo sawi lawk tawh ang a, District thar 3 siam turah Independence Day-ah DC te hnam puanzar pawh pharh tir an nih a, District ramri chinfel ala nih si loh chuan a hmaa an lo awmna DC nge DC thar-in thunei zawk dawn tih thlengin harsatna awm thei a, ngaihtuah chian a \ul a ni a ti.
Opposition Group Leader, Pu Lalduhoma pawhin, an resolution ngaihtuah ho bul\an nana MNF sorkar tia bul\an a ni nghal chu pawi a tih thu sawiin, hei hian Mizorama sorkar-na lo chelh tawhten mipui sorkar din lova, an Party mite duhsak tak leh hleih nei taka ro an rel \hin zia a tilang a ni, a ti a. District thar tipuitling tura hma an laknaah DC leh SP Office chauh sawilan ala ni a, District hi a taka tihlawhtling tur chuan Department 40 vel awm a ngai a, hei hi tuna District tihpuitlin nana Sorkar-in sum a dah sa chuan a daih dawn lo hrim hrim a ni, a ti. Pu Lalduhoma chuan, khawpuia awm leh khawpui nih ringawt chu chankanna a ni ber lova, District Headquarters nih chu a \hat em em rualin, \halai hnathawh tur mumal nei lo leh beidawng mekte chhanchhuah chu ngaih pawimawh hmasak \ul a ni a ti.
Chief Minister a awm loh avanga a aiawha he sawi hona khaikhawmtu Health Minister, Dr. R. Lalthangliana chuan, Districr thar 3 siam chu huphurhawm viau angin lang mah se, kum 5 chhung chuan changtlung taka kal tir theih an beisei tih a sawi a. Tun hnai khan 15th Finance Commission hotuten Mizoram an lo tlawh a, hetah hian Mizoram mamawh hrang hrang an lo thlen zingah District thar 3 enkawl zuina tur Rs. vbch. 12 aia tlem lo dah turin Mizoram sorkarin a lo dil a, hei bakah hian District Hospital tin tihchangtlun nan Rs. vbch 10 aia tlem lo dah turin an lo rawt bawk tih a sawi. Dr. R. Lalthangliana chuan, nimin maia Chief Minister-in Mizoram Budget a pharh takah District thar siam nan nuai 150 \heuh dah a ni a, hei bakah hian a enkawl zuina tur Rs. nuai 855 dah a ni bawk tih a sawi a, DC leh SP Office chu a thar sak kher nghah a nih chuan a rei dawn avangin mimal in luaha bul\an a ni dawn tih a sawi.
Sorkar hmasain ram tana thil \ha tur bul a lo \an tawh chu Pu Zoramthanga kaihhruai sorkar chuan chhunzawm zel a tum tih sawiin, Dr. R. Lalthangliana chuan, Falkawn-a Medical College an lo din pawh a enkawl zui huphurhawm viau mah se, ram tana \ha a nih avangin hlawhtling taka a din chhoh zel theih nan theihtawp an chhuah dawn tih a sawi.
He sawi hona hi khaikhawm a nih hnuah Speaker, Pu Lalrinliana Sailo kaihhruainain House chuan Resolution chu luangrual takin a pawm a. Hemi hnu hian Speaker chuan karleh thawh\annia chhunzawm turin \hutkhawm chu a titawp lailawk nghal a ni. Karleh \hawh\anni chawhma dar 10:30-a Budget session chhunzawm a nih hun chuan hun hmasa darkat 1 chhung chu zawhna leh channa hun atan hman a ni dawn a, hemi hnu hian 2019-20 chhunga Mizoram Budget a tlangpuia sawihona General Discussion neih a ni ang.
