Upper Assam Tinsukia Disrict-a BJP President, Lakheswar Moran hi Citizenship Bill mipuite’n an pawm theih nana thawktu, Lok Jagran Manch pawl buatsaih inhmuhkhawmna tur an ruatna hmun BJP President-in a thlen hian thupui aupui leh puanzar dum keng mipui 3,000 velin an lo hmuak a, heng mite hian amah bakah BJP hruaitu dangte chu an sawisak rawn ta a ni. Lakheswar Moran hi damdawi in pan pui nghal a ni a, BJP Party chuan FIR an thehlut nghal a, \halai 3 man an ni tawh bawk.
Assam-ah hian mipuiten he Bill duhlohna hi an lantir nasa em em a, hetihlai hian kum 2016-a Sarbananda Sonowal-a sorkarin kum 1980 chho vela Assam buainaa nunna chante chhungte hnena a hlan Martyr award chu chhungkaw 125-in Citizehship Amendment Bill duhlohna lantirin Guwahati-ah rally an huaihawt a, hetah hian heng award te hi an pe let leh a ni. Heng an chhungte ngaihah chuan Assam tana mi 855-in an nunna an hlante rah Assam accord hnuaia \hu te chu he Bill hian a tinep vek dawn an ni tiin he Bill hian an chhungte inpekna chu a zahpah loh hle niin an sawi. BJP sorkar chuan an ram, hnam leh thuneihna humhim a ni dawn tiin thu an tiam a, hemi avang hian mipuite chuan an thlangtling a, an thu tiam an hlen leh si loh avangin mipuite chuan an dawh mai mai dawn lo tih an sawi bawk a ni.
Tun thla tira BJP nena an inkungkaihna tichat Asom Gana Parishad te pawhin martyr chhungte hi \awiawmin rally-ah hian an tel ve a ni.
