Assam tuilianah mi 22,00,000 velin harsatna namen lo tawk, mi 10 thi tawh

Assam tui lianin zual lam a pan zel a, district 19-a mi 22,00,000 velin harsatna namen lo an tawk. Assam State Disaster Management Authority sawi danin, he state-a tui lian avang hian Kokrajhar district-ah mi 6, Dhemaji district-ah mi 2, Lakhimpur leh Morigaon district-ah mi 1 ve ve an thi a, district zingah Dhubri-in tui lian hi a tuar nasa ber a, mi 1,00,000 velin harsatna nasa tak an tawk a ni. Sorkarin district 14-ah chenna tur nei lote tana khawsak lailawkna, camp 268 a siam tawh a, tunah hian mi 63,797 vel an awmmek a, hmun him zawkah district hrang hranga mi 2,600 vel chu sawn chhuah an ni tawh nia hriat a ni bawk. Nimin khan PM, Narendra Modi-a’n state CM, Sarbananda Sonowal-a biain, tui lian dinhmun a zawh chian bakah, sorkar laipuiin tanpuina a pek tur thu a hrilh a ni. Puan tawh angin, he state-ah hian April thla atanga thla hmasa thleng khan fur ruah sur avangin nasa takin tui a lian a, mi 85 vel an thi a, kumina Assam-a tui lian avanga chhiatna thleng hi kum 30 vel chhunga a la nasat ber tum nia sawi a ni.