NRC thawh khatna hi January ni 1 khan tihchhuah a lo ni tawh a, khami \um khan hming vbc 1.9 tarlan a ni a, a \um hnihna hi a tawpna tura ngaih a nih tawh vangin, NRC-a hming chuang ve lo te ngaih a \ha lo hle a, heng mi te hian khua leh tui an nihna an finfiah thei lo emaw thuneitute an hmin zo lo a nih chuan dik lo taka India rama awm anga ngaih emaw, ram pawn lama thawn chhuah emaw an ngai dawn niin thu a thang nasa hle a ni. Registrar General of India chuan thla thar ni 30 a\ang hian NRC-a tel ve lo te’n an lungawilohna thuneitute hnenah thlen thei dawn tih a sawi a, khua leh tui dik takte tan chuan hlauhthawn tur a awm loh thu leh kum thara inthlan lo awm turah vote an thlak theih leh theih loh tur chu Election Commission kuta a awm thu a sawi bawk a ni. Puan tawh angin chhiarpui neih hmasak ber, kum 1951 hma lama Assam-a lo awm tawh te leh an thlah kal zel te chu khua leh tui-ah pawm an ni a, kum 1966 January ni khat leh kum 1971 March ni 25 inkara Foreigners Registration Regional Officer hnena inziak lut te pawh khua leh tui-ah pawm an ni bawk a, NRC-a telh tur hian kum 2015 May thla a\ang khan dilna thehluh \an a lo ni tawh a ni.
Union Home Minister, Rajnath Singh pawhin NRC chu duhsak bik emaw thlei bik emaw nei loa kalpui a nih thu leh tuna an hming la chuang ve lo te pawh khua leh tui an nihna finfiahna hun pek an la nih tur thu a sawi ve bawk a, tuna NRC-a hming la chuang ve lo te engti kawng maha beih zui an nih loh tur thu leh NRC hi draft chauh a la nih thu a sawi bawk a ni.
