Assam-ah Mahatma Gandhi lim sawn tum dodal

Assam-a Kamrup district thuneituten Guwahati khawpuia hnampa, Mahatma Gandhi-a lim hun sawn an tumna chu mi tam takin an dodal. He lim hi bronze-a siam niin, kum 47 vela upa a ni a, thil hlui humhalhtu pawl, Heritage Conservation Society of Assam President, Manik Bora-a chuan mi lim ker thiam hmingthang rak, Ramkinkar Baij-a siam a nih thu sawiin, Assam inchhuanna ber a nih thu leh, hetiang thil hlu tak state-in a kawl hi vannei an intih thu a sawi a, hun sawn a nih chuan a pawi dawn hle tih sawiin, district thuneitute ruahmanna hi an dodal dawn tih a sawi bawk. District thuneitute thuchhuah sawi danin, Guwahati khawpui tih changkanna tur, Guwahati Smart City project behchhana Gandhi-a lim inhunna hmun siam that tumna chungchangah Thawhtanni khan Deputy Commissioner, M Angamuthu-a kaihhruaiin thutkhawm neih a ni a, hetah hian thuneitute hian Gandhi-a lim hun sawn an rel a ni. Guwahati Mayor, Mrigen Sarania chuan Gandhi-a lim hi a hlui tawh em avang leh a tarmit bakah a taksa peng thenkhat a chhiat tawh vangin district thuneitute hian hun sawn tul niin an hria tih a sawi a, thawm that chu thil theih ni mah se, a siamtu zah lohna a nih tur thu Sarania hian a sawi a ni.