Hemi chungchang hi MZP President, L. Ramdinliana Renthlei chuan vawiin khan Aizawl Press Club-ah thuthar thehdarhtute a hrilh a, heng mite zinga Mizorama lut tur dang tura Mizoram sorkarin tun thla ni 15 thlenga hmalakna a nei lo a nih chuan MZP chuan a \ul dan ang zelin check gate te siamin ramdang mi, Mizorama lut tur te a dang dawn niin a sawi a ni. MZP hotute chuan sorkar laipuiin kum 1951 khan National Register of Citizen a siam a, kum 1979-a Assam-a by election neih dawnin electoral roll-a hming chuang nasa taka an pun tak avangin All Assam Student Union (AASU) chuan an State-a lut ru ramdang mite zawn chhuaha thawn kir phutin kum 6 chhung zet a bei a, kum 1985 khan khatihlaia Central sorkar leh AASU hruaitute chuan inremna thuthlung an siam a, hei hi sorkar lamin a bawhzui mumal loh avangin Supreme Court-ah zualkovin AASU chuan hma a la a, kum 2014 khan Supreme Court chuan National Register of Citizen chu ennawna ti dik leh turin thutlukna a siam a, chu Court thutlukna kal zelah chuan tuna Assam-a sorkar dinglai hian hma la-in, Court thutlukna angin kum 1971 hnu lama ramdang a\anga Assam-a lut te chu ramdang mi-ah chhiar an ni ta a. He NRC hnuhnung bera ram khualehtui te chhinchhiahna July ni 30-a tihchhuahah Assam-a awm mi nuai 40 chuang te chu ram khualehtui chhiarnaah an tel ta lova, heng mite hi Assam \henawm Meghalaya, Nagaland, Tripura, Arunachal Pradesh, Manipur leh Mizoramah te an tlanchhe mek niin a sawi a, MZP chuan heng mite dang tur hian Meghalaya-ah chuan Khasi Student Union-in ramri-ah hma an la niin a sawi a, Nagaland chuan Assam nena an inri-naah Police te tirin an State-a lut tur a dang niin a sawi bawk a, hetiang bawk hian Mizoram sorkar pawh rang taka hmala turin a phut tih a sawi bawk a ni.
