Asia chhim chhak ram Laos-a kawlphetha siam chhuahna tur tui khuah sah avanga chhiatna chu kum 10 chhunga an ramin chhiatna a tawh rapthlak ber a ni tih Laos Prime Minister Thongloun Sisoulit a’n a sawi.

Thawh\an zana tuikhuah sah thut avang hian mi 23 an thih bakah mi sang 6 chuang chenna in nei lovin an awm mek a, tuikhuah hnuai lama awm khaw tam tak chu tui leh chirhdiakin a chim pil a, mi tam tak chu an chenna in chung chhipah te an la tang a, chhanchhuah hna thawktuten beihpui an thlak chhunzawm zel a ni. He tuikhuah, Xepian Xe Nam Noy Dam tia sawi hi kawlphetha siam chhuahna tur, South Korea sum hmanga thawh a ni a, hnathawh zawh a nih hmain a khuahna hi a chim thut a ni. District governor Bounhom Phommasan chuan mi 2851 chhanchhuah an ni tawh a, mi sang 3 chuang chhanchhuah hmabak an la awm tih a sawi. Ruang 26 hmuh a ni tawh a, chin hriat lova la awm mi 131 te zawn chhunzawm zel an ni. Tuikhuah sah hian mi 11,777 zet a nghawng a, mi 6,000 vel chu an chenna in a tih chhiatsak vek a ni. Khawvel ram dangte pawhin chhanchhuah hna hi an thawhpui thuai dawn tih an ram PM Sisoulit chuan a sawi.