Inkhawmpui kaihruaitu ASEP President Pu K. Lalmuansanga chuan an pawl hmalakna avangin mi 7 in silai an tung tawh a, thang 200 chuang leh sairawkherh 2000 chuang a neituten hmang tawh lo turin an hluihlawn tawh a ni a ti.
ASEP General Secretary Pu Peter Vanlalhriata sawi danin kum 2018 chhungin Tachhip YMA nen Tachhip ram chu Birds Spot atan puang turin inremna ziah fel a ni a, Reiek YMA te nen pawh an YMA ram chu Biodiversity Spot atana puan turin inremna ziah fel a ni bawk. Vawiina an rorel zingah Airgun changkang scope vuah theih chi chu nungcha leh savate suatna hmanraw langsar a nih avangin a khuahkhirh kawngah sorkarin chak lehzualin hma la se an duh thu te, Tiger Reserve, National Park leh Sanctuary 10 Mizoramin a neihte tichangtlung turin sorkarin hma la se an duh thu te a tel a ni.
