Tun thlaa State Assembly inthlanna nei tur, Arunachal Pradesh leh Tripura-ah te vawiin khan PM Narendra Modi chu campaign-in, BJP kaihhruai Sorkar laipuiin hmarchhak bial hmasawnna tur a ngaipawimawh niin a sawi. Arunachal Pradesh khawpui, Itanagar-ah inkhawm hrang hrang a hmanpui a, sorkar laipuiin hmarchhak bial a ngai pawimawh a, state sorkar hotuten Delhi kal kher lo pawha central sorkar hotute an dawr theihna turin a kaihhruai central sorkar-a minister leh officer te chuan hmarchhak bial state hrang hrangte an kal chilh thin a ni a ti a, State CM Pema Khandu hnathawh-te chu tha a tih thu pawh sawiin, hmachhawp tha tak tak a nei chu chhuanawm a tih thu a sawi bawk. Pu Modi-a’n Arunachal Pradesh a tlawh vang hian China a lungawi lo hle a, Tibet ram chin-a an ngaih anih vangin, an lungawiloh thu pawh hi India sorkara an thlen tur thu, China Foreign Ministry thupuangtu, Geng Shuang chuan a sawi a ni.
Tripura Charilam bial chuh tum, Ramendra Narayan Debbarma chu lungphu chawlin chawlhni khan a thi a, State Chief Electoral Officer, Sriram Taranikanti chuan inthlan hun sawn a nih thu a puang a, thla thar ni 12-ah inthlan neih a ni ang a, ni 15-ah vote chhiar a ni thung ang. Taranikanti chuan he bial chuh tumte zingah, CPIM chauhin nomination an thehluh theih tawh thu leh, party dang-te chu pawm vek a nih tawh vangin, hming thehluh theih hun pawhsei sak an nih loh thu a sawi bawk a ni. Puan tawh angin Tripura hi tun thla ni 18 hian an inthlang dawn a ni.
