Arunachal Pradesh Health Minister, Jomde Kena-a chu kum 52 mi niin a thi

Arunachal Pradesh sorkara Health and Family Welfare Minister, Jomde Kena-a chu nizan khan Guwahati-a damdawi inah kum 52 mi niin a thi. Thla khat kal ta chhung khan Pu Kena-a hi Guwahati damdawi inah hian enkawl a ni a, a nupui leh a fate 6 a kalsan a ni. A ruang hi vawiin khan Guwahati atangin, an khua, Lower Siang district-a Gensi panpui a ni a, naktuk hian vui liam a ni ang. Likabali bialtu, Pu Kena-a hi kum 2004 khan MLA atan thlan tlin a ni a, hemi hnu kum 2009 leh kum 2014 khan a bial ngaiah hian a tling nawn leh a ni. State CM hlui, Nabam Tuki-a kaihhruai sorkarah khan Deputy Speaker-a a ni a, CM hlui pahnih – Dorjee Khandu-a leh Jarbom Gamlim-a hnuaiah Parliamentary Secretary a ni bawk. State CM, Pema Khandu-a chuan Pu Kena-a a thi hi pawi a tih thu a sawi a, state sorkarin ni hnih chhung a sun ang a, naktuk hi chawlhah a puang nghal a ni.