Rel khalhtu hian Dussehra lawma mi an punkhawmna hmun an thlen dawn hian vawi eng emaw zat rel horn a tihrik thu a sawi a, Emergency Brake pawh a hmeh thu leh rel a din hman tak loh vanga mipui pungkhawm chu hnawl a nih thu a sawi a, mipuite hian lunga an vawm zui avangin a mi phurhte himna atan a tlan tlang ta niin a sawi bawk a ni. He thil thlenna hmuna awm ve te chuan rel khalhtu in lunga beih an ni a ti chu thudik lo a nih thu an sawi ve thung a, punkhawmnaa tel ve, tualchhung thuneitue leh police pawhin rel hi a tlan chak avangin vawmna hun a awm lo hrim hrim niin an sawi ve thung a, a tlan chak ngaia a tlan reng avangin din a tum lo hrim hrim nia an hriat thu an sawi bawk a ni. Hei vang hian Pathianni lamah khan mipui lungawi lo chuan Amritsar-a relkawng an dang a, rel khalhtu leh Dussehra lawmna huaihawttute man an phut bakah, chhiatna tawkte zangnadawmna tam zawk pek an phut a, rel kawng an dan vang hian police-te nen pawh an innek buai a ni. Chhiatna thleng vang hian Punjab-a eptu pawl Shiromani Akali Dal chuan state Railway Minister Navjot Singh Sidhu bang tura an phut thu leh chhiatna thlen dan kimchang taka chhui an phut thu an sawi a ni.
