Aizawl Municipal Corporation huam chhungah darkar khata kilometre 32.2 aia chaka lirthei khalh Traffic SP in a khap. Hriattirna a tih chhuah chungchang Zonet zawhna chhangin Traffic SP Pu C. Lalthanmawia chuan, The Mizoram Vehicle Rules, 242-ah Municipal huam chhungah lirthei reng reng darkar khata Kilometre 32.2 aia chaka tlan phal a nih loh thu chuang mah se, hemi atan hriattirna hi tih chhuah a la nih loh vang leh dan awmsa chu mipuiin an zawm theih nan a thara tihchhuah a nih thu a sawi a. He thupek hi khauh taka kenkawh a nih tur thu pawh sawiin lirthei tlanchak zawng tehna chu Traffic Police-in nei lo mah se, dan bawhchhe ngei nia lang leh chak lutuka lirthei khalh ang chi chu man zel an nih tur thu a sawi. Traffic SP chuan, dan bawhchhiate chu MV Act, Section 179 hmanga man theih a nih thu sawiin, Rs. 500 thlenga chawi tir theih an nih thu a sawi a, vawi khat aia tam dan bawhchhiate chu an Driving Licence tihtawp thlenga hrem theih a nih thu a sawi. He thupek bawhzui nan hian khawpui chhung hmun remchang laiah lirthei tlanchak theih zawng bituk tarlanna thuziak tar a nih tur thu Pu C. Lalthanmawia chuan a sawi bawk. He thupek hian chhiatna thlen thulha chhanchhuah hna thawktu te, dan leh thupek kengkawhtu te, rikrum thil leh damdawi lam hnathawkte a huam lo a ni.
