Aizawla MG Road-a Bible House bula kawng chhuat bal laiah nizan atang khan lei dawh hna tan a ni. ZONET zawhna chhangin Aizawl Road South Division Executive Engineer, Pu David Sapzova chuan he lei dawh tur hi Built Up Steel Girder Bridge, a ban leh ruhrel thir, a chhuat cement concrete a ni dawn niin a sawi a, hetiang lei hi Aizawl bypass road tia hriat, Folkland atanga Mualpui panna kawnga Chite lui kan na atan an lo dawh tawh niin a sawi. Lei dawh hna hi thla 4 chhunga zawhfel hman tum a ni a, he hna thawh hi lei dawh kawnga Mizo Engineer zinga thiam leh rintlaka ngaih, Pu Lalthlamuana’n a enkawl dawn tih a sawi a, lei dawhna hmanrua chu tunah hian Guwahati atangin rawn phurh chhoh mek niin a sawi bawk. He lei dawh hna thawh tan a nih avang hian he kawng hi lirthei kal theih loha khar nghal a ni a, lei dawhna tur hmunah hian kawng chhuat laichatin lei ban phunna tur laih a ni tawh a, zanin atangin lei laihna khawl chak zawk hmangin hna thawh chhunzawm a ni ang.
—————–
Kawng chhuat bal siam that hna thawh tan tak hi tukin khan Bialtu MLA Pu Vanlalzawma’n a tlawh a. Kawngpui pawimawh tak siamtute chu mipui leh lirthei tana harsatna siam rei lo thawk zo thuai turin a chah a, kawng siam a nih chhung hian mipui leh lirthei tan kal theih a nih dawn loh avangin mipui te pawh dawhthei taka nghak turin a ngen a ni. Pu Vanlalzawma hi Khatla Local Council leh Aizawl West III MNF Block hruaituten an tawiawm a ni.
