Aizawla Mahatma Gandhi Road-a Bible House hmun hlui zawn kawng chhuat bal laia thir lei, feet 170 vela sei dawh hna, PWD hnuaia Blue Hill Engineering-in a thawh mek zawh theih hun tur a ruat hmasak chu hna thawktute dil angin thla 1 danga pawh sei a ni. Zonet zawhna chhangin Blue Hill Engineering Group hotu, Dr. R. Lalthlamuana chuan an hna tawh zawh hun a ruat, thla khat danga pawhsaei an dil a ngaihna chhan chu a tira ruahman dan anga a chhak Tuikhuahtlang kawng a\anga Crane hmanga lei dawhna hmanrua thir rit pui pui khai tum chu a theih leh tak loh vang a ni a, mithiamten kawng awmdan an enin Tuikhuahtlang kawngah hian thir rit khai thei chi Crane daha hnathawh a nih chuan kawng chhuat atan leivung dawla lungrem chuan a zawh dawn loh avangin mihring tha vek hmanga hnathawh a ngai ta a, hemi bakah hian lei dawhna tur hmanrua, West Bengal-a a siamtu firm a\anga an chah te chu a thlen tlai avangte, tun hnaia Mizoram leh Assam ramri buai avanga hnathawktu vai labour hun rei tak chhung an tlanbo avangte-in hna hi a kaltluang thei lo niin a sawi a ni. He lei tawn tirha a innghahna Abutment a sir tawn tawna dah bak chu lei dona ban dang phun loh tur niin Dr. R. Lalthlamuana chuan a sawi a, a phunna tur lei a min avang leh a hnuai lam lei a ngheh loh avangin he lei hi lei inkhaia dawh tum a ni a, a tihchak nan a sir tawn tawnah thir lian tak tak ‘D’ anga rem kual siam a ni anga, chu chuan leia motor rit phur tlan a dawl zo dawn a ni. He lei dawh hnathawk tura mi rawih tam tawk lo nia sawi pawh sawifiahin Blue Hill Engineering hotute chuan hnathawk thei tawk an dah reng niin an sawi a, tunah hian lei dawhna hmanrua an chah zinga za zela 95 vel a lo thleng tawh a, a rem khawm hna chu chak deuha thawh theih a nih a beisawm niin an sawi a, amaherawhchu, hetihlai hian kawng chhak lam kova thing ding, an hnathawh daltu thlak an dilna chu Environment, Forest & Climate Change Deptt. chuan a la remti lo niin an sawi a, chhun leh zan zawma hna an thawh \hin pawh a bul vela mi cheng ten bengchheng an tih avangin zan dar 9:30 thleng chauh hna an thawk thei niin an sawi bawk. He lei hi motor rihna nen tone 100 dawl zo tura ruahman a ni a, dawh zawh a nih hun chuan tuna Aizawl chhim lama Traffic Jam \hin chu nasa takin a ziaawm dawn a ni.
