Aizawla lirthei che vel endik runpui \an a ni a, tukin khan DIG Northern leh Southern Range Pu Joseph Lalchhuana’n Aizawl Traffic Police leh Transport Department Enforcement staff-ten ngaih hna thiamna tel loa lirthei enfiahna ‘ No Tolerance Drive ‘ an neih hi Bara Bazar-ah a hawng a ni. A hawnna inkhawm hi Traffic SP, Pu C. Lalthanmawia’n a kaihruai a. DIG chuan lirthei khalhtute chu kawng tinrenga fimkhur tur leh, dan bawhchhe chunga lirthei khalh lo turin a chah a. Dan zawm kim veka khalh an nih pawhin mi dang tihpalh theihna lakah leh mi dangin an tihpalh theihna tur lakah fimkhur turin a chah a ni. Traffic SP, Pu C. Lalthanmawia pawhin mipui himna atan Aizawl khawpui chhung hmun remchangah dan bawhchhia, a bikin zu rui chunga khalh, mei zu chung leh Mobile phone hmang chunga khalh, phur rit lutuk, khalh chak lutuk leh Document fel leh fel lo an enfiah dawn tih a sawi a.
No Tolerance Drive hman chhung hian Supreme Court Committee on Road Safety duh dan chu ngaih pawimawh a nih tur thu a sawi bawk. Traffic Police-te hian kumin January atanga November thla thleng khan dan bawhchhia a motor khalh 12,043 an man a, heng zinga 7,367 chu Two Wheeler a ni a, LMV 2,421 an man bawk.
