Vawiina chanchin thar lakhawmtute an kawmnaah Thuampui Branch YMA President, LLTF Vice Chiarman nibawk Pu K. Lalrimawia chuan, an venga cheng C. Lalbiakkima hian Sofa Set a phurhluhte a tirah Vairengte atanga a lak nia a sawi laiin Shillong atanga a lak a ni tih a hnuah a sawi leh tih a sawi a, Shillong atanga a lo haw tih hriat a nih veleh Qurantine dan tur ama hova ngaihtuah nghal a ni a, a pa-te awmna Tanhril lama chhuk an dilna chu Tanhril LLTF hotute phalna la hmasa lo leh Sorkar hotute hriattir lo chuan tih chia an ngaih loh avangin bialtu Magistrate hriattir a ni a, ani thupek angin Police lamin hemi zan dar 11 velah an in an kalh sak a ni a ti.
He thil thleng chungchangah hian C. Lalbiakkima leh a pizawn, Mali Tuallawt inti-ten dik lo takin Social Media-a thu an thehdarh tih Thuampui LLTF hotute chuan an sawi a, Police-in in an kalh sak hnuah LLTF-in an ngaihsak zui lo ang te, an chungchangah Thuampui LLTF-in Police lam be pawp anga an sawi te, Quarantine hreh lo anga a insawi te, Home Dept. atanga phalna neia bungraw lalut anga a insawi te, Police-in ni 2 leh zan 2 kalh hnan anga a insawi te, an in bulah mipui pungkhawm ang leh nasa taka rel anga an insawi leh thil dang engemawzat chu thu behchian dawl lo vek a ni tih an sawi a. Social media-a thu an thehdarh avanga Mizoram State Commission for Protection of Child Rights-in naupang mamawh ngaihtuah sak duh lo anga thu an dawng leh thu an zawtfiah hial chu pawi an tih thu sawiin, tawngkam thiam tak hmanga mahni fate hmanga mipui lainat hlawh tum leh an khawtlang tihmualpho tuma an bei chu tha lo an tih thu an sawi.
Thuampui Branch YMA President, Pu K. Lalrimawia sawi danin, C. Lalbiakkima te chhung hi tun thla ni 1-a Falkland veng atanga Thuampui venga insawn an ni a. C. Lalbiakkima te chhung hi an veng atanga hnawhchhuah emaw a hranpaa hremna lekkawh emaw an tum lova, hetihrual hian dan angin pem lehkha nei se tih chu an khawtlang duh dan a nih thu Thuampui LLTF hruaitute chuan an sawi.
