ZPM hian, Aizawl khawpui a him zawkna tur leh dan bawhchhiate awlsam taka chhui theihna tura khawpui chhung hmun hrang hranga Integrated Control and Command Centre dah tur hi Union Urban and Housing Affairs Ministry atanga sum lokal hmanga thawh tur a ni a, a thawk turin Bharat Electronic Limited (BEL) thlan a ni, an ti a. He hna hi BEL chuan anmahniin thawk lovin cheng vaibelchhe 60-a hralh leh chhawn tumin tunah hian tender an chhuah leh mek a, heti a nih chuan cheng vbch. 41 an fanghmano ei hmak dawn tihna a ni, an ti.
ZPM chuan, he hna thawk tura ruat BEL hi hmun danga an hnathawhna-ah hna an thawh chhiat avangin an lo hmingchhe viau tawh tih an sawi a. Belgavi-ah phei chuan, Aizawla an tihdan ang bawkin midang hnenah hna an hralh chhawng a, a hunah an zo thei lo a. Delhi-ah pawh a hun taka hna an zawh theih loh avangin sorkar chuan cheng vbch. 16 chawi tir a tum mek bawk a. Hetiang a ni chunga Aizawl Smart City project hnuaia hlawk uchuak taka contract an la rawn hmu thei chu a mak hle a ni, an ti a. Sorkar laipui, Urban & Housing Affairs Ministry-in BEL hi PSU a nih angin a duhsak a, mah se, State leh UT ten an zawm ngei ngei tur tihna a nih loh avangin state thenkhat chuan an hna a chhiat avangin hna hi an pe lova, Mizoram sorkarin engmah sawisel lova an duh ang anga a tal tir chuan ngaih a ti tha lo hle tih ZPM hian an sawi.
He thilah hian Mizoram sorkar-a a fawng chelhtuten sum siam tumna an lo nei ve a nih chuan inthiar fihlim vat se, PSU hming tha tak ni lem lo hnena hna pek ai chuan tender chhuah that leh tula an hriat thu ZPM hian an sawi.
