Aizawl Municipal Corporation Board of Councillor Meeting chu vawiin khan Mayor, Pu PC Lalhmingthanga kaihhruaia BOC Meeting Hall-ah tan a ni. He BOC meeting-ah hian kum 2018-2019 chhunga AMC Budget tur ruahman Deputy Mayor, Finance changtu, Pu Lalringliana’n a pharh a, budget hi a pumpuiin Rs.64,14,52,000/- a ni a, budget sawihona hi naktukah tan a ni ang. Budget atang hian hmasawnna hna chi hrang hrang thawh tum a ni a, Local Council House sakna atan Rs.2,00,00,000/-, Tuikual South-a motor dahna hmun, Bazar ni nghal sak nan Rs.3,70,00,000/-, Khatla Sabinga lung hnuaia Traffic Point chunga mihring kea kalna tur siamna atan Rs.1,20,00,000/-, Bawngkawna Multi Level Parking siam chhunzawmna tur Rs.1,36,00,000/-, Ward Committee-in Ward tina hmasawnna hna a thawhna tur Rs.20,00,000/- theuh ruahman te a tel a ni. Kan Corr. a hmuna kal sawi danin he Board of Councillor Meeting hi vawiin chawhma dar 11-a tan tura tih nimahsela, Councillor kal an tlem avangin rorel thei khawp an tling lova, anmahni nghah nan Chairman chuan minute 20 chhung vel inkhawm a titawp lailawk a ni.
