Aizawl MG Road-a Bible House bula kawng chhuat bal laiah lei dawh hna ngawrh taka thawh a ni. ZONET zawhna chhangin Aizawl Road South Division Executive Engineer, Pu David Sapzova chuan he lei dawh tur hi Built Up Steel Girder Bridge, a ban leh ruhrel thir, a chhuat cement concrete a ni dawn a, a dawh hna Aizawl Road South Division-in a thawh tur hi Mizo Engineer thiam rual intelkhawm, Blue Hills Engineering-a Engineer thiam Dr. R. Lalthlamuana leh thawhpuiten an buaipui dawn a ni. Lei ban innghahna tur hi kawng chhuat bal sir tawn tawnah Hitachi Excavator hmanga thuk taka laih tawh a ni. ZONET zawhna chhangin Blue Hills Engineering hotute chuan lei dawhna tur hmanraw engemawzat chu phai lam atanga chah thlen a nih tawh thu te, lei dawh hna chu thla 4 chhunga zawhfel hman an tum thu te an sawi a, lei dawh zawh hnuah lei chhuat chu kawng chhuat aia sang hret a ni ang a, lei sei zawng hi meter 50 vel, a zau zawng meter 6 vel a ni dawn niin an sawi a ni.
