Mamit Maxicab Owner’s Association leh Driver’s Association-in Aizawl leh Mamit inkara Maxicab service chu vawiin atang an chawlhtir. ZONET zawhna chhangin Mamit Maxicab Owner’s Association President, Pu Lalhmachhuana chuan an motor an dintir chhan chu Dapchhuah leh Mamit inkar kawng chhiat lutuk vang leh, mihring zin veivakte tan a him tawk lova an hriat vang niin a sawi a, hemi rual hian he kawng enkawltu, PWD Highway Division leh an hnuaia Contractor, Gayatri Company te chu he kawnga a chhe zual laite siam tha turin an ngen nghal a, kawng siam that a nih veleh tlan chhunzawm leh an tum niin a sawi. PWD Highway hotute hnen atanga thu dawn danin he kawng hi Gayatri Company chuan vawiin atang khan a siam tan a, kawng chhe zual laia duty tur hnathawktu an dah bakah Dap lui bula kawng chhe zual laia motor tang nawr chhuak turin JCB pawh an dah niin an sawi
Hachhek tlang dunga Maxicab service te, Mizoram Truck Owner’s Association leh Mizoram Truck Driver’s Association ten Rengtekawn-Bairabi kaltlanga Mamit District panna kawng chhe lutuk siam tha thuai tura PWD an phut angin kawng hi siamthat mek nia hriat a ni a, ZONET zawhna chhangin PWD Highway hotute chuan he kawng siam tha tura harsatna an tawh ber chu ruahtuiin kawng chhuat lei a chiah nem tihruhna tura lung phah tur leh kawng khuar chhe zual lai hnawhna tur lung an hmuh theih loh vang niin an sawi a, kawng enkawltu PWD EE, Pu Sanghrima chuan vawiin khan Kolasib District-a lung quarry neitute chu ko khawmin, lung supply thuai dan tur ngaihtuah turin a ngen a, Silchar lam atanga lung supply thei tur Contractor an ngen pawhin vawiin khan lung trip 7 a phur thleng nia thu dawn a ni a, rang taka lung pe turin lung pe thei turte chu ngen an ni. Puan tawh angin Rengtekawn leh Bairabi inkar kawng hi a chhiat tawh lutuk avangin motor te chi leh motor lian buhfai phur tan tlan a harsa a, hei vang hian Mizoram Truck Owner’s Association leh Mizoram Truck Driver’s Association te chuan tun thla ni 10 ral hmaa he kawng hi siam that a nih loh chuan buhfai phur tura tlan tawh loh an tum thu an lo sawi tawh a ni.
