He training-ah hian Transport Deptt. Joint Director, Pu R. Lalrammawia’n Aizawl Traffic Jam Free Project a siamte hrilhfiahin lirthei tawt lutuk tihziaawm dan tura ruahmanna a siamte a tarlang a, Transport Director, Pu R. Remmawia, Aizawl Traffic SP, Pu H. Ramthlengliana, AMC Councillor, Pu R. Lalbiakthanga leh Information & Public Relation Director, Pu David L. Thangliana te pawhin he Project thil tum leh hmalak dan tur an sawifiah a, he Project hi a taka hman a nih hun chuan mipui chhuak vakin an duhna hmun rang zawkin an thleng thei anga, Petrol leh Diesel hman a tlem ang a, mimal lirthei hmang tlemin mipui hman chi bus leh taxi hman te an uar ang a, hei hian khawpui boruak bawlhhlawh tur nasa takin a veng thei dawn bawk niin a sawi a ni. Hengte bakah hian Mizoram (Regulation and Control of Vehicles Parking) (Amendment) Rules 2018 hmangin lirthei dahna tur hmun ni lova lirthei dahtute pawisa chawitir theih an ni a, dan bawhchhiat vanga man nawn an nih chuan an pawisa chawi a leta tihpun theih a ni ang.
He ruahmanna siam hi a hlawhtlin theih nan huam zau taka mipuite hrilhfiah a ni ang a, Traffic Police te mamawh chi hrang hrang pawh pek theih tum a ni ang a, chung zingah chuan lirthei dahna dik lo, hnuhsawn ngai hnuhsawn zung zungna tur towing truck 4 lei belh rawtna pawh a tel a ni.
