Sorkar thuchhuah tarlan danin NITI Aayog Vice Chairman Dr. Rajiv Kumar chuan nimina amah kawmtu, Chief Minister Pu Zoramthanga hnenah Aerial Cable Car siam tura Mizoram sorkar rawtna chu NITI Aayog in ngun taka a zirchian hnuah siam theih ngei nia an hmuh thu leh sum mamawh tur pawh ruahmanna siam nghal a nih thu a lo hrilh a ni.
Aizawl khawpui chhunga public transport hman lai mek bus leh taxi service in mipui mamawhna a phuhruk zawh tawk loh avang leh mahni leh sum lama amah leh amah in tum thei tur public transport dang, kawngpui titawt belhchhah si lo tur ruahmanna Mizoram sorkarin a siam zing ami Cable Car service siam rawtna hi NITI Aayog-ah thlen a ni a. Ruahman ang chuan Cable car hi Thuampui atanga Solomon’s Temple inkar bakah Durtlang atanga Kulikawn inkarah bun tur a ni.
NITI Aayog Vice-Chairman chuan Ministry hrang hrang ko khawmin he rawtna hi a tihlawhtlin theih dan tur sawiho fel a nih tawh thu Pu Rama hi a hrilh a, sum mamawh tur pawh Ministry pathum Secretary ten a lakkhawm dan tur ngaihtuahin ruahmanna an siam tawh tih a hrilh a ni.
Cable car service siam tur hian a remchan dan tur leh a hlawhtlin dan tur zirchianna, feasibility study neih a ni tawh a, final report duang turin NITI Aayog in a rawih Ernst and Young a mithiamte chu karleh hian Mizoramah an kal nghal dawn tih NITI Aayog Vice Chairman hian Pu Rama nen an inkawmnaah hian a sawi bawk a ni.
Pu Rama hian mau sengkhawmna tura motor kawng sial dan tur pawh Niti Aayog Chairman hi a sawipui tih sorkar thuchhuah chuan a tarlang a, Ministry hrang hrangin hmarchhak tana an budget a\anga zaa 10 an dah hran, hman loha awmte a rang lama pekchhuah anih theihna tura hma la turin Pu Rama hian NITI Aayog Vice Chairman hi a ngen a ni.
An inkawmnaah hian Chief Minister hi Planning Board Vice-Chairman Pu H. Rammawi, Planning Secretary Dr. Vanlalramsanga, Horticulture Department Director Dr. Elizabeth Saipari leh sorkar mipawimawh dangten an \awiawm a ni.
