Aizawl khawpui bakah Mizoram chhung khawpui hrang hrangah pawh vawiin khan MZP huaihawtin ram humhalh nan kawng zawh a ni. Lungleiah chuan Bazar Veng Traffic Point a\anga Venglaia Police Canteen bul thleng mi \hahnem takin kawng an zawh a, kawng zawh zinga a tam ber chu College zirlaite an ni a, tlawmngai pawl hrang hrangte leh mi \hahnemngai engemawzat pawh an tel a ni. He kawng zawh inkhawma thusawitute zinga mi, Lunglei Sub Hqrs. YMA President, Pu R. Lalnunthara chuan Mizoram leh hnam humhalh duha mi \hahnem tak kalkhawm chu ram leh hnam humhalh kawnga lungrual taka hmalakna thlen tir tu niin a sawi a, tun hnuah lungrualna a awm chhoh zel a \ul thu te, he thil hi tute mahin Politics-a ham\hat lakna tura hman tum lo turin a ngen a ni. He inkhawmah hian Lunglei District MJA aiawhin an Treasurer, F. Lalngaihzuala pawhin thu sawiin Bairabi Zophaia kal an member te chunga Assam Police ten kut an thlak chu an dem thu leh zangnadawmna pe tura Assam sorkar an phut thu a sawi a ni. Kawng zawhtute hian resolution an pass a, chung zingah chuan Mizoram humhalh ngamlo sorkar kan mamawh lo, silai mu kara Zofate chhan ngamlo sorkar kan mamawh lo tih leh sorkarin Police-te kut a phuar sak hi phelh rawh se tih te a tel a ni.
Siahaah chuan kawng zawh a ni ve lova, Lawngtlaiah erawh chuan Lai Student’s Association huaihawtin DC Office-a Pisa kai turte dan an ni a, hemi avang hian buaina chhuak engmah a awm lo a ni. Lai Student’s Association hian an zirlaipui Bairabi Zophaia Assam Police te kut tuara an awm an lainat thu leh Assam Police chet dan an dem thu te, Mizoram humhalh tura hmalakna chu chak taka thlawp an tum thu an sawi bawk a ni.
Serchhipah pawh MZP huaihawtin AOC Veng a\anga Kawnpui Bazar thleng vawiin khan College zirlaite leh tlawmngai pawl member ten kawng an zawh a, Bazara inkhawmah thusawiin Sub Hqrs. YMA President, Pu R. Sanghmingthanga chuan ram humhalh kawng zawh chu ram leh hnam humhalh kawnga Mizote zinga \anrualna thlentu ni se a duh thu sawiin, zirlaite chu an mamawh hmu chhuak tura hnamdang kuta innghat lova, anmahni ngeia beih tum tur leh intodelh tum turin a fuih a, Assam mite leh Mizoram mite chu in mamawh tawn an ni tih sawiin, Assam Police te thil tihdan chu a dem thu a sawi a ni. Kawngzawhtute hian resolution pass-in Assam Police te chetdan leh Mizoram sorkar thil tihdan an duh tawk loh thu an tarlang a ni.
Champhaiah pawh MZP huaihawtin Vengsang Biak In bul a\anga Bethel kawn thleng ram humhalh nan kawng zawh a ni. Kawngzawh inkhawma thusawiin Champhai Sub Hqrs. YMA Vice President, Pu F. Lalrinmuana chuan Mizoram chhung ngeia Zofate Chawlhbuk sak remti lova Assam sorkarin Mizoram a nek te, zirlaite leh chanchinbu miten Assam Police kut an tuar chu pawi a tih thu a sawi a, Pathianin Mizote luah tura ram a pek humhalh tura chak taka hmalak a pawimawh tih a sawi bawk. He inkhawm hi Champhai MZP Hqrs. General Secretary, Lalthanfela’n a kaihruai a, hetah hian MZP hruaitute pawhin thu an sawi a ni.
Kolasib-ah chuan Hmar Veng a\anga Diakkawn thleng kawng zawh a ni a, hetah hian Sub Hqrs. YMA President, Pu C. Liankunga chuan thu sawiin ram leh hnam humhalh kawnga MZP \an lakna chu an thlawp thu sawiin, hemi kawngah hian lungrual taka Mizo mipuite \angrual turin a fuih a, he thil thleng hi Politics-a ham\hatna lak tumna chi a ni lo tih a sawi bawk. Inkhawmah hian MUP Sub Hqrs. President, Pu Lianzuala, MJA President, Pu R. Lalhmingthanga leh MZP hruaituten thu an sawi a ni.
Mamitah pawh MZP huaihawtin Charkawn a\anga Field Veng Traffic Point thleng zirlaite leh mipui \hahnem takin kawng an zawh a, inkhawma thu sawiin Sub Hqrs. YMA President, Pu Zatluanga Sailo chuan Assam-in Mizoram a nek chungchangah leh ram leh hnam humhalh kawngah Mizote \angrual tura a duh thu sawiin, ram humhalh tura hmalakna chu YMA-in a thlawp tlat tih a tarlang a, Assam Police te chet dan chu demawm a tih thu a sawi bawk. He inkhawmah hian Mamit Sub Hqrs. MZP President, Lalropuia pawhin thu a sawi a ni.
Bairabi-ah pawh MZP huaihawtin Chhim Veng a\anga Zophai bul Rail Crossing thleng mi \hahnem takin kawng an zawh a, hetah hian thusawitute chuan pi leh pute a\anga an chenna ram humhalh \ul an tih thu te, he thil thleng hi Political Party ten ham\hat nan hman tum lo se an duh thu te an tarlang a ni.
