He thu hi vawiina a Pisa-a thuthar lakhawmtute a kawmnaah sawiin, ECI-in ruahmanna a siam anga November ni 28-a Mizoram Assembly inthlanpui neih tura inbuatsaihna hrang hrang chu peih fel thawkhat a ni tawh niin a sawi. Aizawl District bikah hian Vote nei mi 2,88,322 awmin an zinga 1,51,590 chu hmeichhia an ni a, mipa 1,36,732 an awm thung a, mipa aia hmeichhe vote nei tamna chu 14,858 a ni tih a sawi. Aizawl District-ah hian Assembly bial 14 awmin, vote thlakna hmu Polling Station 328 siam a ni dawn a, Returning Officer 7 leh Assistant Returning Officer 14 ruat tur niin, Returning Officer pakhatin Assembly bial 2 zel a enkawl dawn a ni. Dr. A Muthamma chuan, Assembly inthlanpui neih tur atana inbuatsaihna chu ngawrh taka neih a nih thu leh inthlan leh a kaihhnawih peng hrang hranga mawhphurhna neite chu Training \um engemawzat pek tawh niin, inbuatsaihna pawh peihfel thawkhat a ni tawh niin a sawi. Aizawl District Election Officer chuan, inthlan puan a nih hnuah Model Code of Conduct hman nghal a nih avangin inthlanna leh a kaihhnawih hrang hranga Politcal party-te chet dan leh thil dang sawisel duh neite tana DEO Office-a Call Centre siam chu tihnun nghal niin, Help Line number 1950-ah engtik lai pawha biak a, an lungawi lohnate thlen theih reng a nih thu a sawi bawk. Hemi bakah hian Electoral Roll-a sawisel duh emaw, siam\hat duh emaw nei tan pawh November ni 14 thleng hun hawn a ni dawn a, Electoral Roll-a chuang lo emaw, tih dik lo emaw awm chu District Election Office emaw bial BLO emaw hnenah a dilna form lachhuaka a rang lama siam\hat tir tura ngen an ni tih a sawi.
Zawhna chhangin Dr. A Muthamma chuan, Aizawl District-a Assembly bial 14 a\angin Chalfilh leh Tuivawl biala Polling Station 10 chu vemhim ngai zual bik, Critical Polling Station a puan a ni tih a sawi a, chungte chu – Zokhawthiang, NE |inghmun, Sailutar, Sunhluchhip, Ratu I leh II, NE Tlangnuam leh Daido-te an ni a. Heng hmunahte hian vemhimna khauh taka kalpui a ni dawn a, State Police an duty bakah vote thlak niin Central Police Force Duty tir an ni dawn a, hei bakah hian mipui vote tlak lai chu Video hmanga lak vek a ni dawn tih a sawi. Aizawl District Election Officer chuan, kum 2013 Assembly inthlanpuia vote tla chhiar chhung chu a rei deuh avangin kuminah hi chuan hmun 5-ah vote hi chhiar a ni dawn tih a sawi a. Chungte chu Pachhunga University College, Govt. Hrangbana College, Govt. Aizawl College, Assembly Annex Builduing leh Mualpuia R. Deng\huama Hall-te a ni a. Pachhunga University College-ah Aizawl West I, South I, North I, |awi, Chalfilh leh Tuivawl biala vote tlate chhiar a ni dawn a, Govt. Hrangbana College-ah Aizawl East I leh East II, Govt. Aizawl College-ah Aizawl South I leh II, Assembly Annex Building-ah Aizawl West II leh III leh R. Deng\huama Hall-ah Aizawl North II leh III a vote tlate chhiar a ni dawn a ni. Puan tawh angin Chief Election Commissioner of India, Pu Om Prakash Rawat chuan Mizoram Assembly inthlanpui neih hun atan November ni 28 ruat a ni tih Inrinni tlai dar 3 khan a lo puang tawh a. ECI in ruahmanna a siam dan chuan, Assembly inthlanpui neih tur hriattirna chu November ni 2-ah tihchhuah a ni dawn a. November ni 9 thleng inthlan chuh tumte tan hming pek leh thei niin, November ni 12-ah endik a ni ang a, inhnukdawk leh duhte tan November ni 14 thleng hun hawn a ni ang a. November ni 28-ah vote thlak tur niin, vote tla te chu December ni 11-ah chhiar a ni dawn a ni.
