Aizawl Convention Centre sakna tur hmun laih avanga harsatna hrang hrang thlen dan chu MNF Treasurer, Pu Vanlalzawma hovin MNF MLA leh AMC Councillor \henkhatin vawiin khan an enfiah. MNF General Secretary, Pu Lalruatkima MLA chuan, Aizawl Convention Centre sak nan hian Special Plan Assistance (SPA) 2014-15 hnuaiah cheng 24,99,99,000 ruahman niin a sawi a, kum 2019 April thlaa zawh tura tih a ni a, Aizawl Convention Centre sak tumnaah hian sorkarin a dan siam a bawhchhia a, Aizawl khawpuia in sa turten AMC Building regulation angin phalna an lak a ngai a, sorkarin Aizawl Convention Centre sak hma hian phalna a la fel lova, a leilung a him tawk em tih pawh endik mumal a ni lo a, he Center sak an tumnaa Circuit House \hiah dawn pawhin sorkar in \hiah a nih dawna dan zawm tur pawh zawm mumal lovin, nasa takin dan an palzut nia ngaih theih turin a awm niin a sawi a, mi \henkhatin RTI hmanga DPR an dil pawh sorkarin a pe chhuak ngam lo niin a sawi.
Pu Lalruatkima chuan, sorkarin ruahmanna \ha tawk siam hmasa lova hma a lak avangin nasa takin lei a che a, foundation \henkhat a pil a, a chhaka Bible House Building \hiah a ngaih phah a, Baptist House Building pawh dinhmun hlauhawmah a awm avangin in luahtute pawh an insawn chhuah a ngaih phah hial a, Aizawl hmar lam leh chhim lam panna kawngpui pawimawh, kawng chhuat chanve a bal phah bawk a, hei hian mipui tuarna a thlen nasa hle niin a sawi. Pu Lalruatkima chuan, kawng chhuat bal avang hian Aizawl hmar lam a\anga chhim lam pan tura lirthei kal dan pawh tihdanglam a ngai niin a sawi a, kawng chhuat bal thlang lamah ke-a kalna tur, thing hmangin lei siam a ni a, kawng chhuat bal bak zawngah lirthei ke 2 nei bak a inpelh theih loh avang leh, helai vela mipuite ch^k lakna leh veivahna kawng pawimawh a nih avangin nasa takin harsatna a thlen niin a sawi. Pu Lalruatkima chuan, mipuiin harsatna nasa tak an tawk chunga sorkarin a su kiang zawnga thil a tihhmuh tur a awm lo niin a sawi a, kawngpui bal laia lirthei chitin kal theih turin thir lei (Bailey Bridge) dawh theih nia an ngaih thu leh, a bik takin Aizawl chhim lam mipuite leh Aizawl West-III mipuite chak lakna leh veivahna kawnga harsatna tawh mek chu rang taka su kiang tura sorkar an phut thu a sawi bawk.
Khatla Local Council Chairman Pu Ramliana Ralte pawhin an harsatna tawh hi sorkarin a ngaihthah nia sawiin, pawi a tih thu a sawi a, sorkarin Aizawl Convention Centre sak a hmanhmawh ang khan Aizawl South leh Aizawl West III mipuite harsatna tawh sut kian hi hmanhmawh ve se a duh thu leh, he Building sakna atana lei laihin kawngpui leh khawlai a tihberh nasat thu te, ruah a surin a diak a, khua a \hatin a khu hle bawk a, a bula awmten harsatna an tawk nasa hle tih a sawi bawk.
