Inrinni tlai thim dawna Chite lui kam, World Bank Road-a Airgun kah na chi-a mi kaptu, K. Lalrinchhana, kum 55 mi, Bawngkawna K. Liankhuma fapa chu Police-ten manin thubuai an siamsak mek. A mi kah hi Romalsawma, kum 27 mi, Kawlkulh Dinthar Venga P. Siamliana fapa, Thakthing Venga khawsa a ni a, a kaptu, K. Lalrinchhana hian Chite lui kam, ITI Veng lama Bike-a a tlan lai a zak ding lamah air gun kah na chi, Precihole NX100 Polaris Sporting Airgun .177-in a kap a, a kah hlim hian tlu mah se, a Bike hmangin Salem Venga Zero Point thleng a tlan zui leh a, a hliam hi a nat avangin hemi hmunah hian bawihsawm ngaiin a awm a, Kulikawna BN Hospital-ah lak a ni a, nimin khan zai a ni na a, silai mu hi lak chhuah theih a la ni lova, tunah hian damdawi inah enkawl zui zel a ni.
Police hotute hnen a\anga thu dawn danin, mi kaptu K. Lalrinchhana hi mi a kahna Airgun, BSA scope leh silaimu 774 nen man a ni a, amah hi Mizoram Multi Commodity Producers Co-operative Union (MULCO)-a Procurement & Marketing Supervisor a ni. Mi a kah lai hian Alto Car sen a hmang a, mita hmututen a car number hi an chhinchhiah avangin awlsam takin Police-ten an man chhuak thei a, Court-a hruai a nih hnuah Magistrate chuan Police-te ngen angin thu zawhfiah atan darkar 48 chhung an kawl a phalsak a ni.
