Telecom Company, Aircel chuan a hnathawkte hnenah an sum dinhmun a tlakchhiat thu leh hun harsa tawng tura inpuahchah turin a ti niin Economic Times chuan a sawi. Aircel CEO, Kaizad Heerjee chuan Thawhtanni khan an hnathawkte chu hun eng emaw chen sum lu an neih tawh loh thu leh, an sumdawnna kalpui mek atanga pawisa lo lut hmanga an intun nun hram hram thu email thawnin a hrilh a, sum an tlachham tih pawh National Company Law Tribunal-ah an hriattir thuai dawn tih a hrilh bawk a ni. Aircel hian cheng vbc 15,500 vel leiba a nei mek a, RBI-in tunhnaia company leiba neite ngaihdam theihna dan a sut tak vangin, Aircel hian he thutlukna hi zawh a tum nia hriat a ni a, kum 2016, September thla atang khan Aircel hian pawisa a ba tan a, kar hnih vel kal ta khan, Idea company chuan Aircel nena an inthlunzawmna pawh, a man pek loh vangin a lo titawp tawh a, Aircel-in a ba a pek tlak hma chuan an inthlunzawm rih loh tur thu Idea hotute chuan an sawi a ni. Aircel erawh chuan tun maiah an service tihtawp an tum rih lo niin a sawi ve thung a, an customer te an ngaih pawimawh thu leh, an thutlukna pawh hriattir nghal chu an bat a nih thu an sawi a ni.
Chanchin Thar Aircel sum dinhmun tlachhia niin sawi
