AIADMK MLA 22-in CM, Edapaddi Palaniswami-a an thlawpna hnuk dawk

Tamil Nadu-a rorel lai pawl, AIADMK hnuaia inngeih lo pawl pahnihin pawl pakhata inchhun fin an remtih hnu leh, inchhun finna atan hian Deputy General Secretary, TTV Dinakaran chu paih ni se an tih hnuah, amah thlawptu, AIADMK MLA 22 chuan sorkar ding lai, CM, Edapaddi Palaniswami-a kaihhruai an thlawpna an hnuk dawk tih state Larsap, Vidyasagar Rao an hriattir a, Larsap hi Chennai Raj Bhavan-ah hmuin, an thu tlukna hi an hrilh a ni. DMK Working President, M K Stalin-a chuan Larsap hi sorkar dinhmun, Assembly-a fiahna tur thupek siam turin a ngen a, tunah hian Dinakaran-a thlawptu MLA 19 zinga 15 chu Puducherry-a hotel pahnihah an awm khawm nia hriat a ni a, AIADMK MLA dang 10 pawhin Dinakaran-a hi an thlawp leh dawn nia sawi a ni bawk. Puan tawh angin, state CM hlui, O Panneerselvam-a pawlte ngenna anga, state CM, E Palaniswami-a kaihhruai pawlte’n AIAIDMK atanga Sasikala-i hnawhchhuah an remtih hnuah pawl pahnih hi an inzawm leh ta a, Sasikala-i vahpa, AIADMK Deputy General Secretary, TTV Dinakaran-a thlawptute hi pawl pahnih chhun fin a nih danah hian an lungni lo hle a, Larsap hnenah Palaniswami-a chu paihthlak an duh thu thlenin, CM hian he thilah hian Dinakaran a rawn hmasa lo niin an sawi a, Palaniswami-a hi a party hruaitu atan an ring zo tawh lo niin an sawi a ni.