Mission Organic Mizoram hnuaia Aizawl District Spices Producer Organisation-in Melriat daia Road side Market an sak leh Online Vegetable Market Chain an kalpui tur a hawnnah Pu Sangtea hian, Mizoramin a rin ber State pawn atanga thei leh thlai lakluh chu Chemical engzata tam nge tih pawh hriat a ni lo a, hei hian hrisel lohna hrang hrang a thlen nia hriat a nih avangin Organic thlai chauh ei tura tanlak chu tihmakmawh a ni, a ti a. Hemi kawnga hmalakna piah lamah hian loneitute dikna leh chanvo humhalh tura hmalak a nih tur thu te, kalphung engemaw dik lo vanga loneitute thlai thar chhuah atanga midangin hlawkna tam zawk an tel thin chu ti tawp a, kuthnathawktuten hlawkna tam zawk an tel theih nan hmalak a nih tur thute a sawi a, hemi atana Door Step Delivery System buatsaih a ni chu lawmawm a tih thu a sawi.
Pu Sangtea hian, loneituten thlai chin leh enkawl zuinaa harsatna an tawhte awlsam zawka mithiamte hnena an thlen theihna tur Online Application duan a nih tur thu a sawi a, hemi atan hian hmanraw mamawh hrang hrang pawh lei khawm a nih tawh thu a sawi a, a hlawhtlin hunah hemi hmang hian huan neitute chuan an thlai enkawl dan tur leh harsatna an tawh te awlsam zawkin an hre thei tawh dawn a ni, a ti.
Agriculture Minister hian, tuna Covid 19 hri leng vang hian Sorkar mai ni lo, mimal tin sum lakluh a tlahniam tih a sawi a. Chutihrual chuan, hri leng vanga harsatna thleng mek-ah mipui thinlungah leilung behchhana intodelh tura tanlak duhna a piang thar chu thil lawmawm tak a ni, a ti a. Covid 19 vanga tam thleng thei laka inveng tura tanlak a tul avangin, sorkar pawhin theihtawp a chhuah mek a ni a ti a. Intodelh tura mipui thinlunga danglamna thleng mek chu a taka a chan ngei theih nan mi tinin mawhphurhna an nei tih an hriat a ngai a ni a ti.
