Inrawnkhawmnaah hian Agriculture Development Board member-ten thingtlang khuate ei leh bar dinhmun zirchianna report an siam thlir a nih bakah loneitute tana harsatna awm thei leh chutiang laka fihlim tura ruahmanna awm thei ang te an sawi ho a; Agriculture Development Board Member-te hi Team 3-ah inthenin khaw hrang hranga loneitute tlawh chhuak turin an in ruahman a ni.
Inrawnkhawmnaah hian hri leng vanga Agriculture Department hmalakna hrang hrang thlir ho a ni a, Farmers’ Helpline kaltlanga loneitute mamawh leh harsatna chinfel dan te, FOCUS kalpuina District pali – Champhai, Serchhip, Kolasib leh Mamit-ah Sawhthing, Aieng leh Mizo Hmarcha chi sem a nih thu te, Sub-Mission on Agriculture Mechanization hnuaia Custom Hiring Center 50 te hnenah Power Tiller 75, Mini Power Tiller 75 leh Paddy Transplanter subsidy-a pek tura ruahman a ni thu te, PM-KISAN hnuaiah loneitu sing 8 leh 888 te account-ah cheng vbch. 16, nuai 17, sing 7 leh sang 6 thun a ni tawh thu te, tuna Vaimim chingtuten an seng zawh hunah Vaimim emaw, thai dang emaw ching leh tura hmalakpui an nih thu leh SEDP hnuaiah Be lam chi Acre 1,400 a zauva chin tum a nih thu te sawilan a ni.
Agriculture Minister, Pu Sangtea hian, hri leng vangin mipui thinlungah intodelh duhna a piang thar a ni a ti a, thingtlang lama chengte zingah lo vat hman lote pawhin chul an rit a, chuktuah huan siamte pawh an awm a ni a ti.
