Fada N’Gourma khuaa Prosecutor chuan mi 25 te chu mifirfiak nia rinhlelh an nih avangin hren an ni a, vanduaithlak takin an zinga mi 12 te chu an khungna hmunah an thi tih a sawi a, an thih chhan hi hriat a la ni lo va, anmahni vengtute chuan boruak hip tur a tlem vangin thaw chhamin an thi a nih an ring tih a sawi a, an thih dan dik tak hi chhuichian mek a ni a ti.
Hetiang deuh hian an ram police drug squad te enkawlna hnuaiah nikum july khan mi 11 ruihhlo tawlhrua puhte chu an tanna hmunah thia chhar an lo ni tawh bawk.
Thla khat pawh la liam lovah khan Human Rights Watch (HRW) chuan Burkina Faso security forces ten ralthuam nei lo mipa 31 te chu an man hnu darkar rei loteah an tihlum niin an lo ringhlel tawh bawk.
Africa khawmualpui thlang lama awm, Burkina Faso hian an rama Islam hel, al-Qaeda leh Islamic State group nena inzawmna neite chu an do mek a, hel ho hian ramchhung mi 300 chuang an that tawh a, hel ho thlawptu nia rinhlelh mi 100 vel chu sorkarin a tihhlum tawh bawk.
Mi 12 thi te hi Fula mi vek an ni a, Fula mite hi jihadist te nena inzawma puh an lo ni fo tawh a, Burkina Faso rama security forces te chuan heng mite hi an tiduhdah thei hle nia sawi a ni.
Tualchhung human rights organisation pakhat chuan Fula zirtirtu 1, mifirfiak pawlte nena inzawmna neia puh chu tun thla ni 2 khan Burkina Faso khawpuia police station 1-ah thia chhar a lo ni tawh tih a sawi bawk.
