Afghanistan Taliban mi firfiak pawlin President Donald Trump vau

Taliban mi firfiak pawlin Afghanistan ram chu America sipaite thlanmuala chantirah President Donald Trump a vau a, President Donald Trump-a hian Afghanistan ramah hian sipai sang tam tak tirh leh a tum avangin, Taliban thupuangtu, Zabiullah Mujahid chuan, America hian Afghanistan ram atanga a sipaite a hnuh kir thuai loh chuan, kum zabi 21-naah hian Afghanistan ram chu America sipaite thlanmualah a chang leh thei tih a sawi. Zabiullah Mujahid-a chuan, America hian indo zel ai chuan, Afghanistan ram chhuahsan dan ngaihtuah se a fuh zawk dawn niin a sawi a, America ramah US sipaite an awm zui zel a, Taliban mite an beih zel chuan, an lakah indona thianghlim an chhunzawm zel dawn niin a sawi bawk. Nizan khan President Trump-a hian US sipai hotu lu ber a nihna anga a thusawi hmasak berah, America-in indona a hmachhawn rei ber, Afghanistan rama indona chu a la tawp mai dawn lo niin a sawi a, Afghanistan ram an chhuahsan chuan, a nghawng a chhe hle dawn nia sawiin, America sipaite hmun ruak chu mi firfiakten an hnawh khah nghal dawn avangin, hei hi pawm chi a ni lo tih a sawi. President Trump-a hian Afghanistan rama sipai tirh belh tur zat hi sawi chiang lo mah se, White House hotute chuan sipai 3,900 tirhna tur tifel turin Defence Secretary a hrilh tawh niin an sawi. Zabiullah Mujahid-a chuan, President Donald Trump-a thusawiah hian thu thar tehchiam a awm lo nia sawiin, a hmaa US President te ang bawkin chapo tak leh mawi lo takin thu a sawi leh mai niin a sawi. A awmna hmun hriat chian loh atanga telephone-a AFP a biaknaah Zabiullah Mujahid-a chuan, indona hi chhuan tam tak an lo hmachhawn tawh tih sawiin, engmah an hlauh loh thu te, an rilru chu tihthara a awm zel thu te, an thih thlenga tha thlah hauh lova an beih zel tur thute a sawi a, Afghanistan sorkar ding lai chu US thu thu-a awm a ni tih President Trump-a thusawi atang hian a hriat theih niin a sawi bawk. President Trump-a thusawi hnu lawkah hian, nizan tlai tawh lamah khan Taliban mi firfiakte hian Kabul-a US embassy chu rocket-in an kap nghal a, thi leh hliam erawh chu an awm lo a ni.