Afghanistan ramah hmun thumah thih chilh bomb puak, mi 15 thi

Afghanistan ramah vawiin khan hmun thumah thih chilh bomb tihpuah a ni a, mi 15 an thi a, mi dang 40 vel an hliam. Police te chuan chhim-chhak lama Paktia biala police training-na hmunah thih chilh bomb hi tihpuah a nih hnuah, mi firfiak eng emaw zatin police-te an kap zui tih an sawi a, Paktia bial hi Pakistan rama mi firfiak tamna bial, Taliban zawmpui, Haqqani network mite zalenna bial nia sawi a ni. Haqqani ho hi Afghan sorkar mi pawimawhte ru bova that \hin, ram dang mite pawh hreng meka ngaih an ni a, tun hnaia chhuah t^k, Canada mi, Joshua Boyle, a nupui, America mi, Caitlan Coleman leh an fate pathum pawh hrengtute kha an ni. He inbeihna bakah hian Ghazni bialah car bomb tihpuah a ni a, Andar-ah pawh police-te leh mi firfiakte an inkap nasa hle tih Afghanistan Interior Ministry chuan a sawi. Taliban mi firfiak pawl chuan heng inbeihna pathum hi an tih vek niin an sawi a ni. Thuneitute chuan thi zingah hian hmeichhia leh zirlaite bakah Paktia biala police hotu pawh a tel tih an sawi a, thi zat hi a la pun theih thu an sawi bawk. Nizanah khan US drone-in Pakistan rama Kurram tribal district a bei bawk a, hei hi Paktia nena inri a ni a, Haqqani mi firfiak 5 an thi nia hriat a ni. Taliban ho pawi khawihna, kum 16 awh tawh tihtawp dan tur ngaihtuah hian Afghanistan, Pakistan, United States leh China aiawhte chu Oman-ah an inbia nia thu dawn a ni.