Taliban mifirfiak pawlten Kabul-a hotel changkang pakhat luh chilha an beihnaah mi 22 aia tlem lo an thi a, heng mifirfiakte hian Hotel chhung lamah anmahni tanpui rutu an nei nia rin anih avangin mipuite an la thlabar hle.
Mifirfiakte hian Inrinni tlai lam khan he hotel hi an luh chilh a, thuneitute chuan hotel vehimna an paltlang theih dan hi an la chhui chiang mek tih an sawi. Mifirfiakten silaia an pawng kah chiam chiam lai hian Hotel-a thleng mikhualte chu thlabar takin pindan chhuatah te an bawk a, chhawng 6-a sang, hotel atanga chhuah tum hian mikhual thenkhat chu khum khuhna puante hmangin mangang takin bangah te an uai thla a ni. Darkar 12 zet hnu, Pathianni khan hotel luhchilhtu mifirfiak 6 te hi thah kim an ni tih Afghan thuneitute chuan an sawi.
Afghan health ministry thupuangtu Waheed Majroh chuan ruang 22 chu Kabul damdawiinah lak a ni tawh tih a sawi a, ruang thenkhat chu a kan chhiat nasat avangin DNA Test hmanga an nihna finfiah ngai tur chi a ni tih a sawi. Mitthi te zinga 6 chu Ukrain mi an ni tih finfiah tawh a ni.
