Kum 2013 August ni 10 zana a nupui thattu, Lalremruata Ralte, Aizawl Zarkawt-a cheng chu dam chhung lung in tang tura hrem a ni a. A rual hian a nupui ruang paih puitu, Lalremruata Ralte unaupa, Lalthlamuanpuia, Kolasib Hmar veng chu kum 2 chhung tang tura hrem a ni bawk. Lalremruata Ralte leh Lalthlamuanpuia hrem an nih dan tur hi vawiin khan Aizawl Additional Sessions Judge II, Pu Vanlalenmawia Court-in a ngaihtuah a, Court chuan he thubuai ngaihtuah hmasatu, Aizawl Additional Sessions Judge I, Pu Vanlalmawia Court-in thiam loh a lo chantir tawh angin Lalremruata Ralte chu hrehawm taka dam chhung lung in tang tura a hrem rualin a unaupa, Lalthlamuanpuia chu kum 2 chhung lung in tang turin a hrem ta a ni. Puan tawh angin Aizawl Additional Sessions Judge I, Pu Vanlalmawia Court chuan heng mite hi kumin July ni 28 khan thiam loh a lo chantir tawh a. Lalremruata Ralte hi IPC Section 302 leh 201 hmanga thiam loh chantirin, a unaupa, Lalthlamuanpuia, Kolasib Hmar veng chu IPC Section 201 hmanga thiam loh chantir a ni. He thubuai ngaihtuahtu, Aizawl Additional District and Sessions Judge I, Pu Vanlalmawia chu a damloh avangin District Judge, Pi Lucy Lalrinthari’n he thubuai hi kumin September ni 22 khan Additional District and Sessions Judge II, Pu Vanlalenmawia a hlan chhawng a, Court chuan heng mi 2-te hrem an nih dan tur chu vawiin khan ngaihtuahin, a nupui thatu Lalremruata Ralte chu dam chhung lung in tang tur leh cheng 10,000 chawi turin a ti a, a pawisa chawi tur hi a pek theih loh chuan thla 4 dang a tan belh ang. Lalremruata Ralte unaupa, Lalthlamuanpuia, Kolasib Hmar veng chu he tualthahnaa finfiahna awm thei tihchhiat tum leh tualthattu \anpui tuma puh a nih avangin IPC Section 201 hmangin kum 2 chhung lung in tang tur leh cheng 5,000 chawi turin a ti a. A pawisa chawi tur hi a pek theih loh chuan thla 2 dang a tan belh dawn a ni. Court chuan, vanduaina tawk ta, K. Zohmangaihi nu, Pi Lalhmingthangi Chhangte chu Mizoram Victims of Crime Compensation Amendment (Scheme), 2016 hmangin thla 3 chhunga zangnadawmna cheng nuai 2 pe turin Mizoram State Legal Services Authority a hriattir bawk. Lalremruata Ralte leh Lalthlamuanpuia hi hrem an nih danah an lungawi loh chuan Court sang zawkah an thlen thei a ni.
