Tukin dar 6 vel khan Chaltlang Bethel veng, DIET peng bulah 407 Truck-in Bullet Bike a hnawl a, Motor khalhtu, Lalawmpuia, Sesawng khua chu Police-in an man nghal. Bawngkawn Police Station atanga thu dawn danin, 407 Truck hi Sesawng atanga chawhmeh zuar tur hruaia lo kal a ni a, nizan khan Sesawng atanga an tlan tlaivar avangin a khalhtu hi a muthlu nia hriat a ni a, zu rim a nam bawk nia sawi a ni. He chetsualnaah hian Bike khalhtu, Pu K. Malsawmkima leh a nupui, Pi Zosangliani, Durtlang Leitan chu an hliam nual a, Pu K. Malsawmkima hi a ngal ruh a tliah bakah a malpui a thler a, a lu a hliam bawk a. A nupui, Pi Zosangliani pawh a kawng leh hmun dangah a hliam a, an pahnih hian Aizawl Civil Hospital Casualty panpui nghal an ni a, an ngaihtuahawm lutuk lo nia hriat a ni. Motor khalhtu Lalawmpuia hi Police-in an man nghal a, Bawngkawn Police Station-ah thubuai siamsak a nih hnuah, vawiin khan Magistrate hnenah hruai a ni a, Central Jail-ah dah nghal a ni.
