SEDP atan Budget ah cheng Nuai sing 7 sang 5 dah chunga SEDP cheng khat pawh sem thei loah Congress-in MNF Sorkar an puh.

Vawiin a thuchhuah an siamah MPCC chuan, MNF sorkarin sorkar kum kal mekah SEDP kalpui nan cheng nuai 75,000 sum a dah tih an sawi a, sorkar kum a tawp dawn ruai chung leh kum thar atana budget session neih a ni leh tawh chungin SEDP \anpuina sum dawng pakhatmah an la awm lo tih an sawi a. MNF party hian kum 2018 MLA inthlan dawn khan chhungkaw tin hnenah cheng nuai 3 sem an intiam nia sawiin an president CM Pu Zoramthanga ngeiin chhungkaw tina nuai 3 sem a tum thu a sawi chu a lem hmuh tur pawh a la awm tih an sawi.

MPCC chuan, MNF sorkarin SEDP atana cheng nuai 75,000 a dah chu Sorkar budget zaa 7 a tling tih sawiin a tam hle tih an sawi a, Sorkar department hrang hrangte zingah SEDP atana an sum dah aia budget nei tam chu Department pathum Finance Department, Home Department leh School Education chiah an awm a, department dang PWD, Rural Development, P & E leh Health Department-te budget ai pawhin SEDP-a an sum hlawm dah hi a tam zawk a ni an ti a, hetichunga an intiam anga cheng nuai 3 an sem thei lo chu mak an tih thu sawiin an insawi angin Chhungkaw pakhatah SEDP cheng nuai 3 zelin sem nise budget-a an sum dah hian chhungkaw 25,000 a daih tih an sawi.

MPCC hian SEDP atana sorkarin sum tam tak a dah chu eng atan nge an hman tih chu an zawhna a nih thu leh mipui hnenah sawifiah tura an phut thu an sawi.