US Financial Services Department-in Habib Bank chu mi firfiak pawlte’n an hman thin avangin New York-a an hmun khar turin a ti

US Financial Services Department chuan Pakistan-a private bank lian ber, Habib Bank chu mi firfiak pawlte’n an hman thin avangin New York-a an hmun khar turin a ti a, pawisa chhehrelh leh dik lo taka pawisa lak luh avangin US dollar vbc.22 leh nuai 50 chawi turin a ti bawk. New York-a bank thuneitute chuan Habib Bank hi kum 2006 khan an pawisa che vel, khauh zawka enkawl tura an lo tih tawh thu an sawi a, al-Qaeda nena inzawmna nei, Saudi Arabia-a private bank, Al Rajhi Bank hnenah pawh pawisa tam tham tak tak an thawn thin thu leh, hmun dangah pawh Habib Bank hmang hian mi firfiak pawlten awlsam takin pawisa an inthawn thin niin an sawi a, kuminah pawh pawisa inthawn vawi 13,000 lai, finfiah hmasa lo-in an kal tlang tir thu te leh, insiam tha tura hun tam tak an pek tawh thu te, an ngaihdam theih tawh loh thu te pawh Financial Services Department Superintendent, Maria Vullo chuan a sawi. Habib Bank hi US Dollar vbc.62 leh nuai 90 chawi tura tih a nih hnuah, dan ang thlapa New York khawpuia an branch hi khar an remtih avangin, an pawisa chawi tur hi tihhniam leh niin a sawi a, United States chhuahsan ringawt remtihsak an tum loh thu leh, bank hawn phalna an neih pawh chhuhsak an tum thu a sawi bawk.