Finance Minister Pu Lalsawta’n 2018-19 Mizoram Budget chu mipuite tana buatsaih, mi zawng zawng huapzo a ni a ti. Mizoram Budget a tlangpuia sawi hona, General Discussion tlang kawmin he thu hi a sawi a, Finance Minister chuan Budget buatsaih danah mi zawng zawng huapzo thei ang ber tura ruahmanna siam a ni a, mipuite zingah hmaih an awm lo a, ngaihpawimawh bik erawh \halaite an ni a ti.
Nimin leh vawiin lama Budget sawihona-ah House member 14 ten thu an sawi a, an ngaihpawimawh an sawi chhuah \henkhatte chhangin Finance Minister chuan sorkar hnathawkte hlawh zawng zawng Budget pharh tak hian a fun kim vek a, hlawh lak tur nei lo an awm lo ang a ti a. Dept. \henkhat Centrally Sponsored Scheme kalpui \hinte zingah kalpui chhunzawm ta lo an awm a, heng dept te hi CSS-a an sum thawh ve tur dah sak an \ul ta lo a, hei vang hian kum danga an hmuh zat hmu phak lo Dept. an awm ta a ni a ti. Finance Minister chuan NEDP hnuaiah loneituten phur taka buaipui tham an thar chhuah theihna tura hmalak a ni a ti a, chung an thil thar chhuahte chu \halai lehkhathiam, a ngaihna hria leh mi hausa ten an lo buaipui-a Mizoram hausakna hai chhuah tum a ni a ti a. Motor kawngpui enkawl chungchang pawh sawiin, sorkarin a ngai pawimawh lo a ni lo a, nikum lamah ruahtui a tlak hma vang leh ruahtui a tam em avangin sorkar a che hman ngang lo a ni a ti a, Pathianin mitin tana a malsawm ruah a sur tir chu sorkar ang chuan an tuar nasa hle tih a sawi.
Budget a tlangpuia sawi hona ni hnih chhung neih chu zawhfel a ni ta a, naktuk a\angin Demand for Grants sawiho \an a ni ang a, naktuk bikah chuan Minister pahnih Pu Zodintluanga leh Pu KS Thanga ten kum 2018-19 chhunga an hna chanpual an enkawlna tur sum ruahman sawiho-a pass tum a ni ang.
