2018-2019 Mizoram Budget, Finance Minister Pu Lalsawta’n vawiina a pharhah NLUP leh NEDP te a langsar hle. New Economic Development Policy hnuaia tun sorkar kum kal meka sum dah chu Rs.7,50,00,00,000/- a nih laiin, sorkar kum thara sum hman tur ruahman chu Rs.10,00,00,00,000/- a ni a, kum hmasa lam aiin Rs. 250,00,00,000/- in a tam zawk a ni. NLUP chhunzawmna tur Rs.80,00,00,000/- dah a ni bawk a, hei hi a \ul a nih chuan dah belh theih a ni ang tih Finance Minister chuan a sawi. Kawng chhe siamna tur Rs. 100,00,00,000/- dah a ni a, Chief Minister Rural Housing Scheme ah Rs. 10,00,00,000/-, MLA Fund ah bial tin tan Rs. 1,00,00,000/-, Medical College MIMER atan 14,82,00,000/-, Falkawn Referral Hospital tih changtlunna turin Rs. 20,00,00,000/- dah a ni. Mizoram Road Fund Act 2006 hnuaiah State Road Fund Board leh Secretariat te din thar a ni a, hemi hnuaiah hian Rs.50,00,00,000/- dah a ni. Sports lama mi hming\ha te leh chawimawi tlakte chawimawi nan budget head thar a hranpa-a siam a ni a, Rs.30,00,000/- dah a ni. Home Department hnuaia Police ten silai leh a mu an leina tur budget head hrang siam thar a ni bawk a, Rs.1,00,00,000/- dah a ni. Finance Minister sawi danin kum 2018-2019 chhunga Mizoram sorkar leiba tlingkhawm tura chhut zat chu Rs.78,87,04,00,000/- a ni a, sorkar leiba hi pung chho zel mahse, State Gross Domestic Product a\anga chhut chuan Mizoram dinhmun a ziaawm chho zel niin Finance Minister chuan a sawi. Kum 2013-2014-a leiba Gross Domestic Product nena chhut kawpa za zela 54.46 tling chu kumin sorkar kum tawpah chuan za zela 40.87-ah a tlahniam niin a sawi.
Kum 2018-2019 Budget a pharh rual hian Finance Minister chuan kumin sorkar kum, 2017-2018-a sum indaihlohna phuhrukna tura Rs.22,86,35,61,000/- dil belhna Supplementary Demand for Grants a pharh nghal a, heng zingah hian House-a vote ngai lo chi ‘Charged’ Rs.3,79,31,000/- a awm bawk a ni.
Opposition Group Leader Pu Vanlalzawma’n kum 2018-19 Mizoram Budget chu ram hmasawnna tur lam aiin inthlan tur tinzawna buatsaih zawk niin a sawi a, lawmna tur a awm lo a ti.
