TUALCHHUNG CHANCHIN THAR

Lai Autonomous District Council pawisa, cheng nuai 47 chuang ruk bo a ni. LADC Executive Secretary, Pu C. Zoramthanga hnen atanga thu dawn danin, Zirtawpni khan Lawngtlai SBI atangin hnathawkte hlawh tur, Rs. 5,49,00,000 lak chhuah a ni a, hei hi Exe. Secretary pisa chhunga pawisa dahna-ah dah luh a ni a, heng zinga Rs. 47,95,465 chu ruk bo a ni ta a ni. LADC Exe. Secretary chuan, LADC hnathawkte hlawh tur, SBI atanga lak chhuah, a pisa chhunga an dah lai hian Aizawl-ah a awm a, Inrinni khan Lawngtlaiah a haw niin a sawi a, a pisa hi rawk a ni tih tukin khan hriat chhuah niin a sawi. A pisa chhungah hian a hranpa-in pawisa dahna tur siam a ni a, a kawngkharpui chhungah thir-in gate angin kawngkhar hran siam leh a ni a, chumi chhungah chuan pawisa hi aliminium thingremah an dah niin a sawi a, a rawktute hian kawngkharpui chu hawngin thir gate kar atangin aluminium thingrem chu hmanraw hmangin an pawt hnai a, an pawh hnaih hnu-ah thingrem chu kar chhia-in pawisa hi an la niin a sawi bawk. Misualte hian thingrem chhunga pawisa zawng zawng an la vek lo va, pawisa bo hi Rs. 47,95,465 a ni a, thingrem chhunga air bag-a dah, cheng nuai 29 vel chu a bo lo niin a sawi. Pu C. Zoramthanga chuan, tukin dar 7 vel khan Office chowkidar-in pisa hi rawk a ni tih a hrilh a, hemi hnu hian police ko nghalin police-te’n engkim an chhui nghal niin a sawi a, an pisa rawktu hi an chet dan atang hian anmahni hre chiangtu tak a nih hmel niin a sawi. LADC sum rukbo chungchangah hian Lawngtlai Addl. SP, Pu B. Laldikpuia chuan, man an la neih loh thu leh, thu zawhfiah atan office hnathawk mi 6 vel an lak thu a sawi a, mi sual man chhuak tur hian theihtawp an chhuah tih sawiin, Lawngtlai Police Station-ah thubuai siam a nih tawh thu a sawi bawk. 

RAM CHHUNG CHANCHIN THAR

BJP hruaitu hlun, LK Advani-a’n PM atana an hual nia sawi, Gujarat CM, Narendra Modi ai chuan Madhya Pradesh CM, Shivraj Singh Chouhan-a’n hmasawnna hna a thawh tha zawk niin a sawi a, Gujarat hmasawn dan chu chhuanawm hle mah se, a hma atanga state hmasawn sa a ni a, Madhya Pradesh CM erawh hi chuan state hnufual tak chu state changkang takah a siam tawh nia sawiin,Shivraj Singh Chouhan hian fak a phu hle a ni, a ti bawk. Gwalior-a an party hruaitute thut khawmnaah,  Pu Advani-a chuan Madhya Pradesh CM chu PM hlui leh an party hruaitu hlun, Atal Bihari Vajpayee ang bawka mi inngaitlawm niin a sawi bawk. Information and Broadcasting Minister, Manish Tewari chuan Pu Advani-a thusawi hian BJP chhungkuaah tualchhung indona a thleng mek tih a chiang hle niin a sawi a, Congress party thupuangtu, Shakeel Ahmed pawhin Pu Narendra Modi avangin BJP chhungkuaah buaina a awm mek ni a sawiin, Pu LK Advani-a’n Modi aia Pu Shivraj Singh Chouhan-a a dah san zawk chhan chu Parliament inthlanah seat chan ngei a duh vang nia a hriat thu a sawi a, tun hnaia thil thleng hrang hrang enin, Janata Dal-United (JDU) hruaitu, Bihar CM, Nitish Kumar leh PM atana Modi-a duh lotu, BJP hruaitute inkar-ah inzawmna tha tak awm mek avangin Advani pawhin inthlan lo awm leh tur chu Bihar atangin chuh se a that zawk tur thu a sawi. BJP President, Rajnath Singh erawh chuan Advani-a thusawi chu mi dangin an sawi chhawn dik loh avangin tul lo taka inhnialna a thlen niin a sawi a, a thusawi theh darh a nih dan chu a tum loh dan niin a sawi.  Advani hi BJP hruaitute zinga PM atana Pu Modi-a duh lotute zinga mi nia ngaih a ni a, kum tir lamah pawh khan an party Parliamentary Board-ah Pu Shivraj Singh Chouhan-a hi thun luh a tum hle a, mahse Modi-a hi a lut ta zawk a ni.

RAM PAWN CHANCHIN THAR

China rama ar sa sawngbawlna hmun kangah mi 119 an thi a, mi dang 54 vel an hliam. Xinhua news agency sawi danin, Beijing khawpui hmar chhak lama Dehui khuaa ar vulhna leh talhna hmun hi Jilin Baoyuanfeng Poultry Company enkawl a ni a, hnathawktu mi 1,200 vel an chhawr thin na-in, tukina kangmei chhuah lai hi chuan mi 350 vel an awm nia hriat a ni. Kangthelh pawl pawhin theihtawp an chhuah mah se, he hmun-ah hian rikrum thila insasengna tur a awm that loh avangin an duh angin hna an thawk thei lo a ni. Kangmei chhuah chhan tak hi hriat a la ni lo a, CCTV-a a lan dan chuan hnathawktute an inthlak laia chhuak nia hriat a ni a, kangmei chhuah lai hian electric nia hriat tum 3 vel a puah avangin electric kal sual vanga he kangmei hi chhuak a nih rin a ni. He vanduaina thlenga hliamte hi damdawi inah enkawl an ni a, hliam zingah hian ngaihtuahawm tak tak an la awm a, kangmei chhuahna hmunah pawh hian ruang zawn mek a ni.  He biala kang thelhtute chuan sa sawngbawlna khawl tihdaihna-a an hman, boruak alh thei chi khat, ammonia putin kangmei hi a tichhuak nia an rin thu an sawi a, he hmun hi a chhung a hnawk nuai a, chhuahna a chep bakah a hma lam gate a inkalh bawk si avangin tlan chhuak duhte pawh an che thei lo niin an sawi bawk.  He kangmei hi chhun lai velah thelh fel a ni a, a sulhnu chhui mek a ni. He hmun atang hian khawpui hrang hrangah kum tin, ar sa sawngbawl sa, ton 67,000 vel an thawn chhuak thin a,  kum 2009 khan an din a, tunah chuan China ram khawpui 20 chuangah ar sa an thawn chhuak tawh a ni.

Powered by WordPress | Designed by: video game | Thanks to seo services, seo service and Etiketten drucken