RAMCHHUNG CHANCHIN THAR

President thlanna chuh tumtu, Lok Sabha Speaker hlui, PA Sangma-a chu Nationalist Congress Party atangin a bang. Pu Sangma hian President thlanna hi chuh a tum tlat avang leh, an party-in chuh lo se an duh si avangin an party chhuahsan mai lo chu tih tur dang a nei ta lo niin a sawi a, he party hi kum engemawzat kal ta-ah khan  Pu Sharad Pawar-a nen an din dun a ni. Pu Sangma chuan Pu Pawar-a hnena lehkha a thawnah,  NCP chhuahsan mai loh chu duh thlan tur a nei ta lo niin a ziak a, a banna lehkha hi Pu Sharad Pawar-a pawhin a lo pawm nghal a ni. Hemi hma hian President thlanna lo awm tur hi PA Sangma hian a chuh luih chuan hrem a ni dawn nia hriat a ni a, NCP hian Pu Sangma hi he inthlan chuh tum lui lo turin khauh takin an hrilh tawh a, an party hian inhrem ngai lova a rilru thlaktir tuma an beih laiin a bang ta zawk a ni. Pu Sangma hi NCP dintute zinga mi a nih avangin an party miten an zah hle a, mahse an party hi sorkar laipuia rorel lai, UPA-a an tel avang leh UPA hian an candidate atan Pu Pranab Mukherjee an ruat tawh avangin President thlanna hi chuh lo mai se an duh a ni. UPA-a tel pawl dangte zingah Mamata Banerjee-i kaihhruai, Trinamool Congress chauh lo chu thu hran nei an la awm lo a, NCP President, Sharad Pawar-a pawhin thu hran neih a duh lo a ni.  Pu Sangma erawh chuan President thlanna hi a chuh a nih pawhin tribal mite aiawha chuh tur a nih avangin an party duh dan a kalh loh a beisei thu a sawi a, amah hi Tamil Nadu CM, J Jayalalithaa leh Odisha CM, Navin Patnaik-a’n an lo thlawp ve bawk si a, BJP pawhin thlawp ve mai a hnial lo nia sawi a ni. Heti chung pawh hian Pu Sangma hi a la tling zo dawn chuang lo a, mahse BJP hian kum 2014-a Lok Sabha inthlanpui lo awm tur thlir paha mipui leh party hrang hrang mar deh nan President thlanna hi hman a duh nia hriat a ni. Hetih lai hian BJP kaihhruai, National Democratic Alliance chuan President thlan tur chungchanga thu tawp siam tura an thut khawm hun chu an sawn hla a,  Left Front thuchhuak an nghak phawt dawn nia hriat a ni. BJP hruaitu hlun, Pu LK Advani-a chuan President thlanna tur hi inchuh ngei a duh thu a sawi na a, candidate tur chu an la tifel chuang lo a, tunah pawh hian NDA-a tel, Shiv Sena chuan UPA candidate, Pu Pranab Mukherjee-a hi an thlawo tur thu an puang a, anni bakah hian NDA-a tel ve bawk, JD(U) hruaitu, Nitish Kumar leh Punjab-a rorel lai, Shironami Akal Dal pawhin Pu Mukherjee-a hi chuh buai loh mai an duh a, tun thleng hi chuan UPA candidate, Pu Pranab Mukherjee-a hi a tling ngei dawn niin a la lang zel a ni.
————

BJP hruaitu pakhat, Maneka Gandhi chuan President candidate, Pranab Mukherjee-a hi a kawm a, Pu Mukherjee-a chu President atana mi tha tak a nih thu sawiin, candidate dang awm lova pawm tlan theih ni se a duh thu a sawi. Union Minister hlui lerh Pi Sonia Gandhi-i mo-pui nu, Maneka Gandhi chuan President thlanna hi inchuh ngai lovin, pawl hrang hrangten Pu Mukherjee-a hi pawm tlang thei se a duh thu a sawi a, BJP erawh chuan President thlanna turah hian a ngaihdan a la sawi chiang lo a ni. Kar hmasa pawh khan  Maneka hian India ramin President atan Pranab Mukherjee hi a mamawh tih a lo sawi tawh a, kum 30 chhung an inhmelhriat tawh thu sawiin, President awmze nei, ram tana mi chhuanawm a nih ngei tur thu a lo sawi tawh a ni.
————-

Congress party chuan an hruaitu pakhat, Digvijaya Singh chu an khak a, General Secretary ni mah se, party thupuangtu a nih loh avangin party aiawha thusawi tur a nih loh thu a sawi. AICC thuchhuah sawi danin, Digvijay Singh-a hi party aiawha thusawi thei tura thuneihna pek a ni lo a,  tun hnai lawk khan TV hmaah Digvijay Singh-a hian an thawhpui, Trinamool Congress hotunu, Mamata Banerjee-i chu mi rintlak loh leh puitling tawk lo niin a sawi a,  Congress President, Sonia Gandhi leh PM, Manmohan Singh pawh tiluhaitu-ah a puh a ni. Hemi hnu, nimin lawkah khan Digvijay Singh-a bawk hian Vice-President, Hamid Ansari chu a hna ngai, kum nga dang chelh zui turin Congress-in a ngaihtuah thei ang, tih a sawi leh bawk a, Vice President thlan tur chungchangah party-in ngaihdan engmah a siam hmaa he thu a sawi mai pawh hi Congress hruaitute chuan tha an ti lo hle a ni. Digvijay Singh-a hi tawng duh ve tak, a ngaihdan chu khawiah pawh sawi mai chi a ni a,  Union Home Minister, P Chidambaram-a pawh Naxalite ho chungchanga sorkar policy chungchangah a bei chiam tawh a, Anna Hazare-a leh a pawlte chet nasat deuh lai pawh khan party hriatpui lohvin a lo vir vel chiam tawh bawk a ni.
———–

Vawiin khan West Bengal-a Madhupur leh Jhajha inkarah rel station master leh kuli pakhat chu Maoist helho nia hriatten an ru bo a, hei vang hian Howrah leh Delhi inkara rel tlan dan pawh a buai deuh a ni. Rel lam hotute sawi danin, heng mite ruk bo an nih hun hi chawhma dar 10.30 vel kha a ni a, helho hian silaia tin chungin an hruai lui a ni. Heng mite hi Maoist ho huaihawt bandh an zawm ve loh avanga ruk bo nia rin an ni.
———–

Bihar-a Muzaffarpur district-ah thla khat kal ta atanga vawiin thleng khan thluaka khawsik lut natna avangin naupang 204 an thi tawh a, niminah pawh khan 4 an thi leh a ni. State sorkar hotute sawi danin, he natna vei hriat tawh, 527 zinga 204 chu an thi a, a dangte chu enkawl dam an ni. He natna hi thosi seh atanga intan a ni a,  district 10-ah a darh tawh nia sawi a ni.
————

Powered by WordPress | Designed by: video game | Thanks to seo services, seo service and Etiketten drucken