RAM PAWN CHANCHIN THAR

Pakistan PM, Yousuf Raza Gilani chu Supreme Court-in a ban a, PM thar thlan tum mek a ni. Nimin khan Supreme Court hian Gilani-a hi MP a nihna a ban a, hemi hma thla hnihah khan Court zah lovah puhin thiam loh a lo chantir tawh a ni. Mak angreng takin Supreme Court thuchhuak hi rorel lai, Pakistan People’s Party chuan i-he lovin a pawm a, sawisel hauh lovin PM thar tur a buaipui nghal mai nia thu dawn a ni. Pakistan ramah hian sorkar leh dan hmanga rorelna lam hi thla 30 vel chhung an lo inbei tawh a,  nimin khan Supreme Court Judge 3 awmna bench, Chief Justice Iftikhar Chaudhry-a kaihhruai chuan kum 60 mi, Gilani-a hi kumin April ni 26 atang khan PM a ni tawh lo tih a puang ta thut a ni.  Puan tawh thin angin,  Supreme Court hian Gilani-a hi President Asif Ali Zardari-a ei ruk thubuai chu Switzerland-a tithar leh turin thu a lo pe tawh a, hei hi a zawm loh avangin PM hi court zah lovah puhin thiam loh a lo chantir tawh a ni. Rorel lai pawl, PPP hian Gilani hi a tawp thlenga a thlawp tur thu a puan rin a nih laiin, court thuchhuak hi a pawm tur thu a puang ta zawk a, PM thar tur an buaipui ta nghal a ni. Pakistan PM thar atana langsar ber chu Makhdoom Shahabuddin a ni a, Minister ni lai dang, Chaudhry Ahmed Mukhtar leh Khursheed Shah-a hming pawh a ri bawk a, PM thar thlang tur hian naktukah an Parliament, National Assembly thutkhawm koh a ni ang. Gilani hi thiam loh chantir a nih hnu khan National Assembly Speaker, Fehmida Mirza chuan Gilani hi MP a nih zui a remti a, hei vang hian PM pawh a ni zui zel thei a, hei hi eptu lamin duh lovin Speaker ngaihdan khin letna hi court-ah a lut tam hle a ni.  Pakistan Supreme Court hian a thupekah hian India rama court rorel dan pahnih a tarlang a, “Jagjit Singh vs State of Haryana” thubuai leh “Rajendra Singh Rana vs Swami Prasad Maurya thubuai rem a nih dan chu beh chhanah a hmang tel a ni. Hengah te hian Parliament Speaker ngaihdan chu Court-in a ngaihtuah thei a, dan kalhah a ngai a nih chuan a hnawl thei tih tarlan a ni.

Hemi hnu, vawiin khan President Asif Ali Zardari-a hovin Pakistan Peoples Party (PPP) hruaitute chu an thu khawm nghal a, PM thar atan hian Makhdoom Shahbuddin-a dah an rel ta niin Geo News chuan a sawi a, naktuka National Assembly thut khawm hunah nemngheh a nih rin a ni. PM bang ta, Yousuf Raza Gilani-a chuan amah thlak turin Shahbuddin hi a duh chiah lo nia sawi a ni a, mahse President Zardari-a’n a thlang ta nia hriat a ni. Pakistan PM hlui, Nawaz Sharif-a chuan PM bang ta, Gilani-a hian Court thupek a zah loh avangin a mualpho ta niin a sawi a, PM thar tur chu tupawh ni se, Switzerland ram hruaitute chu President Zardari-a thubuai tithar leh tura a nawr ngei ngei a ngai tawh dawn niin a sawi.
————-

Egypt President hlui, Hosni Mubarak-a chu thi leh dam karah a awm mek a, a dam chhuah beiseina a awm tawh loh avangin a thih thu, doctor-ten an puan an nghak ringawt tawh nia sawi a ni. Mubarak-a hi khawl hmanga thawktir a ni a, hmun thenkhatah phei chuan a thi tih puan a ni tawh a ni. Kum 84 mi, Hosni Mubarak-a dinhmun chungchangah hian tuna rorel mek, sipai hotute zinga mi, General Said Abbas-a chuan, nikhaw hre lovin awm mah se, a la thi lo niin an sawi a,  General Mamdouh Shaheen-a pawhin President hlui hi chau hle mah se, a la nung hram hram niin a sawi. Mubarak-a hi nizan khan Tora lung in atangin Cairo-a Maadi sipai damdawi inah lak a ni a, a nupui, Suzanne Mubarak-i pawhin damdawi in hi a pan nghal a ni. Muhammad Hosni Sayyid Mubarak-a hi 1928 May ni 4-ah a puang a, chhungkaw rethei taka piang ni mah se, 1949 khan Egypt Military Academy atangin a zir chhuak a,  1950 khan Air Force-ah a lut a ni. Egyptian Air Force hotu leh Deputy Minister of Defence a nih laiin Sinai peninsula-a Israel beihnaah a bul tumtu a ni a, hei hi 1973-a Yom Kippur indona bul tanna kha a ni. A hnu kum hnihah President Anwar Sadat-a’n Vice President-ah a hlang kai a, 1981-a President Sadat-a kah hlum a nih khan President a ni ta a ni. Heta tanga kum 30 zet, kumin kum tir lam thleng khan President a ni ta ngar ngar a, tun hnai lawkah mipui lungawi lovin an paih thla ta a ni.
————-

Burma rama eptu hruaitu, Aung San Suu Kyi chuan Britain ram a tlawh mek a, London-a a cham chhungin Parliament-ah thu a sawi bakah, lal chhungkua a kawm ang. Nimin khan Suu Kyi pian champhaphak, a kum 67 tlin ni a ni a, London School of Economics leh BBC Burmese Service Radio station a tlawh a ni. Suu Kyi hian a haw dawn hnaih lamah Prince of Wales leh Duchess of Cornwall pawh a kawm dawn a, vawiin hian a zirna hlui leh a pasal sun tawh thawhna thin, Oxford University tlawhin honorary doctorate degree a dawng ang a, Oxford University-ah hian a pasal leh an fate nen kum engemawzat an khawsak tawh angin Suu Kyi tan hian a lunglenthlak hle dawn a ni. Suu Kyi hian naktukah British Parliament in hnih member thu khawmte hmaah thu a sawi ang a, PM, David Cameron leh Foreign Secretary William Hague pawh a kawm ang.
————–

Mexico rama thu khawm mek, G-20 ram hruaitute chuan sum leh pai harsatna leh leiba nasa takin Europe khawmualpuia ram engemawzat a chim buai mek dan chu ngaihmawhawm an tih thu an sawi a, hei hi khawvelin harsatna a tawh hautak ber pawlah ngaiin, a sut kian dan tur leh, tun hnua a thlen tawh loh dan tur an ngaihtuah a ni. European Commission President, Jose Manuel Barroso chuan he harsatna hi Europe chauh ni lo, ram dangte pawhin an tawk nasa hle tih a sawi a,  World Bank President, Robert Zoellick pawhin he harsatna chungchangah hian thil tih dan tur kawhhmuh turin Europe ram hruaitute thuchhuak an ngaichang mek niin a sawi.
————-

America ram mipuite zingah India mi nihna lo nei tawh, tuna US-a awm nghet ta te chu a khawsa thei leh dinhmun ziaawm ber ber nia ngaih an ni a, hnam hlawm khatah chuan lehkha pawh an thiam ber ni hiala sawi a ni. Tam lamah pawh Asia ram atanga pem lutte hian Latino ho an khum tawh a, an thang chak ber bawk nia sawi a ni. Pew Research Centre report, nimina tihchhuaha a lan danin, America ramah hian India mi mtd. 3 chuang an awm a, pem lutte zinga a tam ber chu China atanga lut, mi mtd 4 vel leh Philippines atanga lut, mi mtd. 3 leh nuai 4 an ni. India ram atanga pem lut, mi naran hian kum khatah dollar 88,000 an la lut phak a, Asia ram dang atanga lutte chuan dollar 66,000 vel an la lut deuh ber a, US mi nawlpui phei chuan dollar 49,800 vel an la lut tlangpui a ni.
————–

British hmeichhe pakhat, Lianne Smith, kum 45 mi chuan Spain rama an zinnaah a fate pahnih chu an muthlih hlanin a rek hlum a, an ruang chu zankhuain a riahpui a, a thiltih rapthlak tak avang hian kum 38 chhung tang tura tih a ni. He hmeichhe huaisar tak hian a fanu kum 5 mi, Rebecca Smith leh a fapa thla 11 mi, Daniel chu kum 2010 May thlaah khan Spain rama hotel pakhatah sarangin a rek hlum a, hemi hma lawk hian a ngaihzawng chu Barcelona-ah Police ten an man a, hemi avanga a rilru hrehawm chuan he thil rapthlak tak hi a ti ta nia sawi a ni.
————

Powered by WordPress | Designed by: video game | Thanks to seo services, seo service and Etiketten drucken