TUALCHHUNG CHANCHIN THAR

Lai Autonomous District Council pawisa, cheng nuai 47 chuang ruk bo a ni. LADC Executive Secretary, Pu C. Zoramthanga hnen atanga thu dawn danin, Zirtawpni khan Lawngtlai SBI atangin hnathawkte hlawh tur, Rs. 5,49,00,000 lak chhuah a ni a, hei hi Exe. Secretary pisa chhunga pawisa dahna-ah dah luh a ni a, heng zinga Rs. 47,95,465 chu ruk bo a ni ta a ni. LADC Exe. Secretary chuan, LADC hnathawkte hlawh tur, SBI atanga lak chhuah, a pisa chhunga an dah lai hian Aizawl-ah a awm a, Inrinni khan Lawngtlaiah a haw niin a sawi a, a pisa hi rawk a ni tih tukin khan hriat chhuah niin a sawi. A pisa chhungah hian a hranpa-in pawisa dahna tur siam a ni a, a kawngkharpui chhungah thir-in gate angin kawngkhar hran siam leh a ni a, chumi chhungah chuan pawisa hi aliminium thingremah an dah niin a sawi a, a rawktute hian kawngkharpui chu hawngin thir gate kar atangin aluminium thingrem chu hmanraw hmangin an pawt hnai a, an pawh hnaih hnu-ah thingrem chu kar chhia-in pawisa hi an la niin a sawi bawk. Misualte hian thingrem chhunga pawisa zawng zawng an la vek lo va, pawisa bo hi Rs. 47,95,465 a ni a, thingrem chhunga air bag-a dah, cheng nuai 29 vel chu a bo lo niin a sawi. Pu C. Zoramthanga chuan, tukin dar 7 vel khan Office chowkidar-in pisa hi rawk a ni tih a hrilh a, hemi hnu hian police ko nghalin police-te’n engkim an chhui nghal niin a sawi a, an pisa rawktu hi an chet dan atang hian anmahni hre chiangtu tak a nih hmel niin a sawi. LADC sum rukbo chungchangah hian Lawngtlai Addl. SP, Pu B. Laldikpuia chuan, man an la neih loh thu leh, thu zawhfiah atan office hnathawk mi 6 vel an lak thu a sawi a, mi sual man chhuak tur hian theihtawp an chhuah tih sawiin, Lawngtlai Police Station-ah thubuai siam a nih tawh thu a sawi bawk. 
————

Excise & Narcotics Department miten nimin chhun dar 12:30 vel khan Chhinga Vengah Pseudoephedrine, mum 1,15,385 an man. Hemi chungchanga sorkar thuchhuah sawi danin, he drugs neitu nia hriat, Tuanneihthanga, kum 28 mi, Tathanga tia hriat bawk, Myanmar mi, Falam District-a awm inti chu man a ni a,  ND&PS Act, 1985 tlawh chhanin thubuai khirh tak siamsak a ni. He damdawi hi Delhi atanga a lak nia hriat a ni a, Aizawla an hralhna rate-ah chuan cheng nuai 8 chuang man a tling a ni.
————-

Khatla Bethel Venga Pu Lalrinawma Hrahsel varandah-a Two Wheeler pali – Bike pahnih leh Scooty pahnih chu tu tih hriat lohten tukin khan an hal a, heng lirtheite hi a kang chhe hle a, thu zawhfiah atan Aizawl Police Station-ah mi 6 lak an ni. He thu buatsaih lai thleng hian thu zawh fiah an la nih avangin thu chiang hriat tur a la awm lo a ni. Bike pahnih leh Scooty pahnih hal a ni tih hre hmasa ber, in neitu nu, Pi Varhmingliani chuan khawvar hma, zing dar 2:30 velah thil kang ri tek tek thawm a hria tih sawiin, a tirah chuan an Refrigerator thawm emaw a ti a, hemi hnua a va thawh chuan an kawta Two Wheeler-te chu hal a ni tih hria-in, a theih ang angin thenawm khawvengte a pun nghal a, theihtawp chhuaha an thelh hnu, zing dar 3:00 khan an thelh mit thei a, kang thelh pawl pawh an pun lo niin a sawi bawk. Heng Two Wheeler pali hal takte hi kawngpui sir mai, Pu Lalrinawma Hrahsel te varandah-a dah a ni a, Pu Lalrinawma Hrahsel te In pawh hi mei hian a hliau dum nasa hle a, helai hnaivaia chengte sawi danin, in hi Assam Type chu ni se a kan ral vek rin a ni. He pawi khawihna thleng-ah hian Aizawl Police Station-ah FIR ziah luh a ni a, tukin dar 6:00 vel khan Police te pawhin helai hmun hi an thleng a, rinhlelhawm nia hriat mi 6 an la nghal a ni. Thu zawh fiah atana lak, mi 6 hi mipa pali leh hmeichhe 2 an ni a, Zonet thu dawn danin, heng mite hi Khatla, Lawngtlai, Bethlehem leh Bungkawn lam mite nia hriat an ni a, an paruk hian tukina kangmei chhuah lai vel hian kangmei chhuahna bul hnaiah Two Wheeler-a an inphur hmuh a ni a, khawvar hnu thleng khan Khatla Presbyterian Biak-In bulah an la thut khawm avangin thu zawh fiah atan lak an ni. Lirthei hal chhiat takte hi Scooty MZ-01 D 0615, Lalsiammawii ta, Scooty (Vespa) MZ-01 J-2564, Lalchhandami ta, Karizma Bike MZ- 01 F-8713, Vanlalsawma ta leh Bullet Electra MZ-01 E-3880, Lalbiakzuala ta te an ni a, an vai hian Khatla Bethel venga Pu Lalrinawma Hrahsel In luah vek an ni.
———

New Market-a sa zuarte chuan vawiin thleng khan sa zawrhna buildingah sa an la zuar zel a, Trade & Commerce Department-in New Market-a sa zawhna building chu mipui pun khawm nan a him tawh loh avangin he building-a sa zuarte chu May thla ral hma-a chhuak turin a ti tawh a, mahse helai hmuna sa zuarte chuan sorkar-in an awmna tur a ruahman loh chuan chhuah mai an tum loh thu an sawi. Vawiin khan kan Corr. chuan New Market-a sa zawrhna hmun hi a tlawh a, sa zuarte chuan building hi a hlauhawm tih hre mah se, sorkar-in an awmna tur a ruahman loh avangin sa hi an la zuar niin an sawi a, an chunga sorkar thil tih dan chu na an tih thu pawh an sawi a ni. Sa zawrhna hnuai bera awm, vawk sa zuarte chuan an awmna chunga cement chu a khawk leh ringawt thin niin an sawi a, an chunga bawngsa zuarten sa ruhkawl an sah nat deuh phei chuan a chung chu a derthawng hle thin niin an sawi. New Market Sa Zuar Controller Board pawhin kan Corr. zawhna chhangin an awmna tur chungchangah hian sorkar dawr leh phawt an tum niin an sawi.

Trade & Commerce Director, Pu C. Lalzirliana he building hi a him tawh loh avangin a chhunga awmte chu chhuak turin an ti tawh tih sawiin, helai hmuna inzuarte awmna tur chu khawi lai pawh ni se, a building a him loh avang leh, chhiat rupna a thlen palh theih avangin sorkar chuan mipui him nan chhuahsan turin a ti niin ZONET  a hrilh a ni. Puan tawh angin, Trade & Commerce chuan kumin April ni 15 khan thupek chhuahin New Market-a sa zawrhna building chu a him tawh loh avangin he building-a inzuar thinte chu chhuak turin an ti a, hemi duh lo hian sa zuarte chuan May ni 16 khan New Market chhunga hmun awl zau lai, high mass light bulah sa an zuar a, hemi hnu, thla hlui ni 21 khan Director hian thupek chhuah nawn lehin May thla chhunga he building hi chhuahsan vek turin a ti leh a ni.
———–

May ni 30-a Farkawna MZP Sub Hqrs hawngtu, MZP Hqrs hruaitute lo haw lam, Vaphai Joint Action Committee-in Vaphaiah an lo chang nia chanchin thara puan chu a dik tawk lo niin Vaphai Joint Action Committee chuan a sawi. Hemi chungchanga thuchhuah an siamah Vaphai Joint Action Committee chuan, he thuthang hi Farkawn MZP hruaituten an hriatin Vaphai Joint Action Committee chu thil awmzia an zawt fiah a, Vaphai JAC chuan thil tha lo tih an tum loh thu leh an zin haw lam chu thingpui lo inpui a, Vaphai ram chhunga lo kawm an duh thu an hrilh a, chu rawtna chu MZP hruaitute chuan an tihlawhtling lova, hemi hnu hian Vaphai JAC chuan Chawngtui khuaa inbiak a rawt leh a, chu pawh chu MZP hruaituten an duh loh hnuah MZP hruaitute rawt angin Farkawn khuaah an inkawm ta niin a sawi a, hemi hnu hian MZP hruaitute chuan Saikhumphai mite tanpuina tur sum an ken chu Farkawn khuaah Saikhumphai khaw mite an hlan a ni. Farkawna an inkawmnaah hian Vaphai JAC chuan MZP hruaitute chu him taka an hawn theih nan Vaphai khaw ram chhungah ven an inhuam thu pawh an hrilh nia thu dawn a ni. Vaphai JAC chuan ngun taka thil awm dan an ngaihtuahin MZP rilru put hmang chu hriatthiam har an tih thu an sawi a, Aizawla chhiatna rapthlak tak a thlen laia Saikhumphaibawk mite tanpuina pek chungchangah hmanhlel taka an awm leh, thawm lian tak nena tum hnih lai helai hmuna an feh chhuak chu ngaihtuahna tikal thuitu niin an sawia, mahni ram chhunga ram neitu tana ding, tlawmngai pawl hrang hrangte thawhpui hlei thei lova awm chungin ram danga unaute suih khawm an tum chu thil harsa tak a nih an rin thu, Vaphai JAC chuan an sawi bawk.
————-

AH & Vety Department chuan kumin March leh April thla vela Aizawla Vawk hri leng kha Classical Swine Fever a nih bakah, khami rual khan Vawk natna hri hlauhawm zawk, Porcine Reproductive and Respiratory Syndrome (PRRS) a leng tel niin an sawi. Hemi chungchanga tun hnaia thuchhuah an siamah AH& Vety Department chuan khatih lai huna Vawk damlo thisen leh thil dang, Barapani-a ICAR Research Complex-a an thawn leh Selesiha College of Veterinary Science-a an thawn atangin kha hri lengah khan PRRS a tel tih fihfiah a ni tih a tarlang a, he natna hi kum 1987 khan US-ah hmuh chhuah a ni a, tunah hian Myanmar leh Asia ram hmun hrang hrangah a leng mek a, he hri hi Artery virus siam a ni a, Vawk zun, chil, chi leh hnutetuiah te a awm a, ei, inpawl leh Artificial Insemination atangte-in a kai theih niin an sawi. He hri venna vaccine hi India-in a la siam chhuah loh avangin fimkhur a ngai hle a, Myanmar atanga Vawk lak luh chu hun eng emaw chen khap a ngai dawn niin an sawi bawk. Hetih lai hian he natna hi Mizoramah chuan a reh ta duak rih niin an sawi bawk.
————-

Thla hlui ni 11 zing khawvar hma-a Laipuitlang lei min rapthlak tak sulhnu chu thenfai zui zel a ni a, PWD building chimin a thlang kawngpui a hnawh pin pawh a tlang leh tawh a ni. He lei min rapthlak taka thite ruang lak chhuah kim a nih atang khan a sulhnu leh in chakte chu mihring tha leh khawl hmanga then nghal a ni a, khawl hmangin ni tin lei paih a ni a,  truck trip sang chuang fe paih a ni tawh niin Laipuitlang khawtlang hruaitute’n ZONET an hrilh a ni. Chhiat an tawh chungchangah Laipuitlang Local Council leh YMA hruaitute chuan, anmahni lainattu Mizoram mipuite chungah lawmthu an sawi a, an mangan laia tanpuitu, sorkar, Central YMA, Mizoram mipui leh SDRF-te chungah lawmthu sawiin, Mizoram mipuiin an tanpui avangin an thla a muang hle tih an sawi bawk. Laipuitlang khawtlang hruaitute chuan, he lei min avanga thi ta chhungte hi sorkar-in Rs. 1,50,000 theuh, in chhiate chu Rs. 35,000 leh bungraw chante chu Rs. 2,700 theuh a pe tih an sawi bawk.

Laipuitlang Local Council chuan, an venga PHE tanky put pawh siam tha turin PHE Department hotute an hrilh tawh tih an sawi a, lei min rapthlak tak an tawrh avangin an veng chu an ralkhel tawh hle a, PHE tanky put pawh hi siam tha thuai turin sorkar an ngen tih an sawi. Laipuitlanga PHE tanky put hi Laipuitlangah hian hmun thum velah a hmuh theih a, tui a tamin a put tam a, tui a tlem deuh lai chuan a put tam lo a ni.
————

ZNP Sr. Vice President, Pu R.Lalawia chuan, Congress MLA te’n corruption-ah an fihlim tih sawia, lepse ngam nia an insawi laia PRISM-in Congress hotu thenkhat chhuina tura FIR-a thehluh, an party hotuten nasa taka an tawng leh si chu thil inhmeh lo tak niin a sawi. He thu hi ZNP Office-a vawiina inkhawmah sawiin Pu R.Lalawia chuan, Congress MLA thenkhat, MLA an nih hmaa an eizawnnate leh, MLA an nih hnua in an sak dan te ngaihtuah chunga chhui fiah tura ACB ngenna FIR, PRISM-in a theh lut chu an thianghlimzia finfiahna atana thil lawmawma ngai lova an tawng let leh, MLA thenkhatin intih hmingchhiat man, ‘Defamation Case’ hial siamah na vau chu a hma lama an thusawi nen thil inhmeh lo tak niin a sawi a ni. He inkhawm hi an party Gen. Secretary Pu K.Laltuvela’n a kaihruai a ni.
—————

Trade and Commerce Minister, Pu Lalrinliana Sailo chuan ramria insumdawn tawnna atana ruahmanna kal mek chu Mizo thalai tam tak, cheng nuai tam tak hai lut tura sumdawnna-a an zuan luh theihna tura a tih a ni a ti. Myanmar-a khaw pahnih,  Monywa leh Mandalay khawpuia North East India -Myanmar Regional Business Conclave-a a tel hnuah Inrinni khan Minister hian Aizawl a lo thleng leh a, thenawm state – Manipur, Moreh khuaa insumdawn tawnna lian tham kalpui mek angin heng ruahmanna hi Zokhawtharah kalpui ve ngei tum a nih thu sawiin, hemi atan hian Zokhawthar Land Custom Station chu peih fel a ni tawh a, Champhai bula Melbuk Border Trade township pawh zawh fel a ni tawh tih a sawi a. Tun hnai khan Zokhawthar atanga Rih kal tlanga Tiddim thlenga kawngpui siam tur chu sawrkar laipui leh Myanmar sawrkar chuan pawmin, MOU ziah fel a ni tawh a, he kawngpui hi siam zawh a nih chuan helai sumdawn tawnna atang hian sum tam tak hai luh beisei a ni a ti bawk. North East India -Myanmar Regional Business Conclave ah hian Minister hi Myanmar Sagiang Region Chief Minister, U Thar Aye nen an inkawm a, Myanmar Sagiang Chief Minister hi Zokhawthar Land custom station hawn huna tel ngei turin a sawm a, Sagiang CM hian tel ngei a tum thu leh rokhawlhna a  awm palh a nih pawhin a aiawh tal tirh a tum thu a sawi a ni. Pu Lalrinliana Sailo hian India Look East Policy hnuaia Kaladan Multi Modal Tranport Project hnuaiah Lawngtlai atanga Myanmar ramri thleng, kawngpui km 100-a thui sial a nih thu sawiin, he kawng hian Zorinpui Land Custom station, Square Km nuai 1 a zau chu a pawh tur thu leh, heta tang hian Sittwe lawng chawlhna thlenga pawh tura ruahman mek a nih dante a hrilh a, he Conclave-ah hian Manipur CM leh Minister te bakah Nagaland Minister-te pawh an tel a ni.
———–

April ni 29 atanga Langkaih Group YMA leh Taitesena Group YMA ten an khar, Langkaih lei chu vawiin tlai dar 4:30 khan hawn a ni leh ta. A hawnna inkhawmah hian Langkaih Group YMA hruaitute leh Damcherra-a sumdawng pawl hruaitute an tel a, inkhawm hi Langkaih Group YMA President Pu J.Malsawma’n a ho a ni. Hemi hma lam, May ni 22 khan Damcherra-a sumdawng pawl hruaitute chuan lei hawng leh turin Group YMA hruaitute ziakin an ngen a, hemi hnu hian an ngenna chu ngaihtuah zui a ni. Hetih lai hian, Tuikuk-te erawh chuan Langkaih Group YMA leh Taitesena Group YMA in ngaihdam dil tura an phutna chu an la chhang lo a, Langkaih Group YMA leh Taitesena Group YMA te chuan Tripura lam mi, Tuikuk, Mizoram chhunga inhlawhfaa lo kal thinte chu chhawr zui lo turin Mizoram mite an hriattir zui leh a ni. Langkaih Group YMA hian April ni 21-a Damcherra-a kawng zawh
huaihawta Sebaram Reang thih chungchanga mawhphurtua Mizoram Police-an puh chungchangah leh Bungthuama mi pakhat leilet-a hnathawk tura vai chhawr, Monaf-a te chhungkua, Tuikuk ralthuam keng 8 in suam a, a nupui leh fanu an pawngsual chungchangah lungawi lohna an neih avangin Tripura nena inkal pawhna kawngpuia Langkaih lei hi an dang a ni. Zawhna chhangin Langkaih Group YMA hruaitute chuan Mizoram mi, Tuikuk refugee, Tripura Camp-a awmte lak let tur chungchangah sorkar thu hnialna engmah an nei lo tih leh, dan anga thil tih chu tha taka thlawp an tum tih kan corr. an hrilh  a ni.
—————–

Lunglei District High Powered Committee Vice Chairman, Pu Joseph Lalhimpuia chuan kum li chhunga Congress sorkar hnathawh chu mipuite hmuh theihin a awm a, NLUP-ah pawh thliar bikna nei lovin Party dang mi, englai maha Congress vote lo turte pawh tanpuina pek an ni a ti. He thu hi vawiina Lunglei Congress Bhavan-a Party mite inkhawma sawiin, Pu Joseph Lalhimpuia chuan, a tira NLUP-an sem tak tak lovang tia sawi hnawmtute chu NLUP chan loh hlauva phe phe an ni leh tawh zawk niin a sawi a, sorkar atanga hamthatna awm chu huapzo takin sorkar chuan mipuite a pe thin niin a sawi bawk. Kumin kum tawp lama Mizoram Assembly inthlanna neih tur hmachhawn tur leh chak tura lungrual taka tan la turin party mite a ngen a, hnehna an chan ngei a beisei thu a sawi bawk.
—————

Mizo zinga Mt.Everest tlang lawn chhuak hmasa ber, Pu David Zohmangaiha leh Base Camp Manager, Pu Vanlalliana chawimawina leh lawmpuina inkhawm chu vawiin khan Sports Directorate-in an office-ah buatsaih a, Director, Pu Lalzirmawia Chhangte chuan Pu David Zohmangaiha leh Pu Vanlalliana te hlawhtlinna hian Mizo thalaite thinlungah namen lovin thu a sawi tawh a, a sawi zui zel bawk dawn a ni, a ti a, Everest tlang chhip chuang tura taimakna, huaisenna, tumruhna leh chhelna an neih hi Mizo tawh phawt chuan an ngaisang vek a ni, a ti bawk. Pu David Zohmangaiha pawhin tun tuma an tlang lawn hautakzia sawiin, thi lo a ruangin a thleng hram niin a sawi a. Kum 2003 lam daih atang khan Everest tlang lawn tura a lo sual ve thin thu sawiin, tlang lawn dan zira course chi hrang hrang a zawh hnuah kum 2009 khan Pre-Everest Expedition nei tur zingah thlan ve a nih thu leh sum senso tur a hautak em avanga khatih laia Sports Director, Pu Zoliana Royte a pan thu te a sawi a.  Sorkar atanga chhawmdawlna a dawn chhoh zel avanga lawmthu sawiin, tuna Sports Director, Pu Lalzirmawia Chhangte puihna leh Mizoram sorkar tanpuina nen 1st North East Mt. Everest Expedition Team-ah telin May ni 18 zing dar 5:30-ah khan khawvel tlang sang ber chhip chu a chuang ve ta tih a sawi. Base Camp Manager, Pu Vanlalliana pawhin tlang lawn hrim hrim hautakzia leh inbuatsaihna namen lo a tul dan te, Everest a lawn hi mi nazawng tana tih ve chi a nih loh thu leh tehna hrang hrang pal tlang tur tam tak a awm thute sawiin, amah ngei pawh Base Camp Manager mawhphurhna pek a nih danah hun harsa leh pal tlang tur tam tak a pal tlang thu te, Base Camp Manager a nih anga a mawhphurhna sanzia te a sawi a. David Zohmangaiha thawhrimna leh tumruhna chu chhuanawm a tih thu a sawi bawk. Pu David Zohmangaiha leh Base Camp Manager Pu Vanlalliana te lawmna inkhawm hi hi Inrinni tlai khan sorkarin Vanapa Hall-ah a buatsaih a,  Larsap, Pu Vakkom Purushothaman-a’n lawmpuina tangkfai a hlan ve ve bawk. He inkhawm hi Sports & Youth Services Secretary, Pu R.Vanlalvena’n a kaihhruai a, Larsap chuan Mizoramin hun lawmawm leh chhinchhiahtlak tak a thleng tih sawiin, Pu David Zohmangaiha hian Mizo te tan rahbi thar a siam a, a hlawhtlinna chuan thalaite tan chona lian tak a siam bawk a ni a ti. Base Camp Manager, Pu Vanlalliana inpekna pawh fakin Larsap chuan, tanrualna leh thawhhona tha hian rah duhawm tak a chhuah fo reng a ni a ti bawk.  Larsap hian Mizoram sorkar aiawhin Pu David Zohmangaiha hi lawmpuina tangkafai cheng nuai 5 a pe a, Pu Vanlalliana pawh hi cheng nuai 3 a hlan bawk a ni.
———-

Green Mizoram Sub-Committee ruahman angin Lunglei District-ah tun thla ni 11, kar leh Thawhlehni khian Green Mizoram Day hman a ni dawn. Hemi chungchangah hian Dist. Bawrhsap, Pu V.Sapchhunga kaihhruai Lunglei District Green Mizoram Committee chuan vawiin khan ruahmanna kimchang a siam a, hemi ni hian Pukpui Centenary Lungphunna hmunah inkhawm buatsaihin, sorkar hnathawk leh tlawmngai pawl hrang hrang atanga thawk chhuakte chuan kum 2011 leh 2012 inkara Pukpui leh Tlawng inkar kawngpui sira thing phun humhalh in an hung ang a, Pukpui ram leh Saza tlang hnuaia leipui leh huan neitute’n thingphun tam tak an hal hlum takte thlak nan an hmunah thing an phun dawn a, Lunglei District chhunga khawtin VC, YMA, MUP, MHIP leh AMFU member te chu an khua theuhah thing phun ve turin an ngen bawk a ni. Lunglei District Green Mizoram Committee chuan Kohhran hrang hrangte chu thingphun uar leh ram ngaw humhalh pawimawhzia, an Kohhran member-te zirtir turin a ngen bawk a ni. He inkhawmah hian Lunglei Forest Division-a DFO, Lunglei District Green Mizoram Committee Member Secretary ni bawk, Pu Kawlhnuna chuan he ni hman dan tur ruahman a nih dan a sawifiah a ni.

Puan tawh angin, Green Mizoram Sub-Committee chuan tun thla ni 11, kar leh Thawhlehni-a lo thleng tur chu Green Mizoram Day hman ni atan a ruat a, hemi ni hian Mizorama heni hmanna pui ber, Durtlanga ICFAi University Campus-a neih turah CM chu khuallian a ni ang. Puan tawh thin angin, Green Mizoram Day hi kum 1999 atang khan kum tin hman thin a ni.
————-

Falkawn Branch YMA chuan an Branch kum 30 tlin lawm nan vawiin khan Aizawl Civil Hospital-a hman atan thisen unit 34 an pe a, a petute hi mipa 32 leh hmeichhe 2 an ni. Falkawn Branch YMA hian kum 2005 atang khan kum tin, damlote tan thisen an pe a, tum tum hi tum 8-an pekna a ni ta a ni.
————

Zalen chanchinbu leh Lynchpin tang dun buatsaih, Edu Fest vawi 11-na chu vawiin khan Aijal Club-ah Social Welfare Minister, Pu PC Lalthanliana’n a hawng. Kumin Edu Fest-ah hian ram chhunga zirna in 38-te’n an zirna in fakin an pho lang a, zirlai bakah nu leh pa eng emawzatin an tlawh a ni.
———–

Home Minister, Pu R. Lalzirliana’n HPC (D) leh Mizoram sorkar aiawhte inbiak tum mek chu a hun tur ruahman fel a la ni lo niin a sawi. Kan Corr. zawhna chhangin Home Minister chuan, HPC (D)-ten Political levela inbiak an rawtna chu CM hova sawiho phawt a ni ang a ti a, Rural Development lama inkhawmpui leh, CM leh Home Minister te, Security lam thil pawimawha tel tura an kal haw lamah hei hi sawiho a nih tur thu leh, thutlukna pawh siam a nih a beisei thu a sawi bawk. Mizoram sorkar leh HPC (D) aiawhte hi kumin January ni 31 khan Aizawl-ah an inbia a, hemi hma hian Silchar-ah inbiak dan tur duangin an lo inbe tawh bawk. Aizawl-a an inbiaknaah hian thla ruk chhung atana inkah haina tur thuthlung an ziak a. April ni 19 khan inkah hai zawm a nih dan viltu atana din SP, CID (SB) kaihhruai, Joint Monitoring Group chu Sakawrdai Tourist Lodge-ah an thu khawm a. Hetah hian HPC (D) chuan inbiakna kal mek chu political level-a hlan kai an duh thu, sorkar aiawhte an hrilh a, hei hi tunah hian bawhzui mek a ni.
——

NLUP Implementing Board hnuaia Media Cell chuan vawiin khan Kolasib khaw chhunga NLUP tanpuina dawngtute hnathawh dan an en fiah. Heng mite hi Chief Media Officer, Pu David L.Thangliana’n a hova, an tlawh zingah hian Kolasib Hmar venga TZ Nursery-a Horticulture Department-in Serthlum kui tiahna leh budding-an tihna hmunte, Vengthara Bawng vulhtu, Pu Laldingngheta, New Diakkawna Vawk vulhtu, Pu Lalduhawma leh Vengthara Ar vulhtu Pi Zothansangi te an tel a ni. NLUP tanpuina dawngtu chhungkaw hrang hrangte hi Pu David L. Thangliana chuan an tanpuina dawn dik taka hmanga, din chhuahpui tum turin a fuih a ni.
————

AH&Vety Department chuan NLUP Phase II hnuaia tanpuina, First Installment chu vawiin khan Khawruhlian, Hmunnghak, Khanpui, Buhban, Suangpuilawn, Khawlek, Lamherh leh Vanbawngah a sem. Tanpuina dawngtute hi Ar, Vawk leh  Bawng vulh thlangtute an ni a, tanpuina an dawn hi ran in sakna tur a ni a, hemi rual hian Sub-Divisional Veterinary Officer-te chuan tanpuina dawngtute chu an thil pawimawh leh tih tur an hrilhfiah nghal  a ni.
—————

Nimin, Pathianni khan Guwahati-a Panikhaiti (Rail Gate) hmuna Mizoram UPC Biak In thar chu hawn a ni.  He Biak In hi General Missions Chairman, Rev.Ngurthanpara Sailo-in nimin chawhma inkhawmah khan Pathian hnena hlanin a hawng a ni. Hemi hnu hian Pathian biak inkhawm neih nghal a ni a, he inkhawmah hian Mizoram UPC General Secretary Rev. Thangliansanga’n mi thar 32 a lawm lut a ni. Mizoram UPC hian Guwahati-ah hian thlanmual ram tur pawh a nei tawh a ni.
————–

Vawiin khan Aizawlah khaw lum lai berin Celsius Degree 29.6 a ni a, a vawh lai berin Celsius Degree 20.4 a ni. Hemi chhung hian ruah millimetre 3 a sur a ni. Boruak hi a ro lai berin za zela 40.8 a ni a, a hnawn lai berin za zela 89.2 a ni.
————-

Naktuk, Thawhlehni-ah chuan ruah a sur rin a ni a, khaw lum lai berin Celsius Degree 29 vel, a vawh lai berin Degree 21 vel a nih rin a ni. Zing dar 4:32-ah ni a chhuak ang a, tlai dar 6:02-ah a tla leh ang.
—————

Both comments and pings are currently closed.

Comments are closed.

Powered by WordPress | Designed by: video game | Thanks to seo services, seo service and Etiketten drucken