RAM CHHUNG CHANCHIN THAR

BJP hruaitu hlun, LK Advani-a’n PM atana an hual nia sawi, Gujarat CM, Narendra Modi ai chuan Madhya Pradesh CM, Shivraj Singh Chouhan-a’n hmasawnna hna a thawh tha zawk niin a sawi a, Gujarat hmasawn dan chu chhuanawm hle mah se, a hma atanga state hmasawn sa a ni a, Madhya Pradesh CM erawh hi chuan state hnufual tak chu state changkang takah a siam tawh nia sawiin,Shivraj Singh Chouhan hian fak a phu hle a ni, a ti bawk. Gwalior-a an party hruaitute thut khawmnaah,  Pu Advani-a chuan Madhya Pradesh CM chu PM hlui leh an party hruaitu hlun, Atal Bihari Vajpayee ang bawka mi inngaitlawm niin a sawi bawk. Information and Broadcasting Minister, Manish Tewari chuan Pu Advani-a thusawi hian BJP chhungkuaah tualchhung indona a thleng mek tih a chiang hle niin a sawi a, Congress party thupuangtu, Shakeel Ahmed pawhin Pu Narendra Modi avangin BJP chhungkuaah buaina a awm mek ni a sawiin, Pu LK Advani-a’n Modi aia Pu Shivraj Singh Chouhan-a a dah san zawk chhan chu Parliament inthlanah seat chan ngei a duh vang nia a hriat thu a sawi a, tun hnaia thil thleng hrang hrang enin, Janata Dal-United (JDU) hruaitu, Bihar CM, Nitish Kumar leh PM atana Modi-a duh lotu, BJP hruaitute inkar-ah inzawmna tha tak awm mek avangin Advani pawhin inthlan lo awm leh tur chu Bihar atangin chuh se a that zawk tur thu a sawi. BJP President, Rajnath Singh erawh chuan Advani-a thusawi chu mi dangin an sawi chhawn dik loh avangin tul lo taka inhnialna a thlen niin a sawi a, a thusawi theh darh a nih dan chu a tum loh dan niin a sawi.  Advani hi BJP hruaitute zinga PM atana Pu Modi-a duh lotute zinga mi nia ngaih a ni a, kum tir lamah pawh khan an party Parliamentary Board-ah Pu Shivraj Singh Chouhan-a hi thun luh a tum hle a, mahse Modi-a hi a lut ta zawk a ni.
——-

Aam Aadmi party hruaitu, Arvind Kejriwal-an Delhi Assembly inthlan lo awm turah CM, Sheila Dikshit-i dinna bial apiangah din a tum thu a sawi a,  an party mite kal khawmnaah he thu hi sawiin, Pi Dikshit-i chu khawiah pawh ding se, khin a duh thu a sawi. Inthlan hmasa-ah khan BJP chuan tlin an inrin loh avangin tling lo tur sa-a an ngaih chu Pi Dikshit-i an khintir niin Kejriwal-a chuan a sawi a, inthlan leh hunah chuan BJP aiawhin an hruaitu, Vijay Goel-a’n Pi Dikshit-i nena an inbeihna tur bial chuh ve se a duh thu pawh a sawi a ni. Kejriwal hian New Delhi Assembly bialah Pi Dikshit-i nena inthlan hmachhawn a chak thu a sawi a, Pi Dikshit-i hi New Delhi bialah ding ngam lo-a hmun danga a insawn a nih pawhin a um zel tur thu sawiin, Delhi mipuiten eirukna avanga a hun tihtawp an duh tawh, an CM hi paihthlak ngei an duh thu a sawi a ni.  Kejriwal hian BJP chu Congress paihthla thei en-in mipuiin an en tawh lo niin a sawi a, kum 15 kal ta chhung khan BJP leh Congress-in dan lo-in ro an rel tawh nia sawiin, a kaihhruai Am Aadmi Party (AAP) chauh chu Congress rorelna paihthla thei tur party niin a sawi bawk. AAP hruaitu dang, Prashant Bhushan  chuan Arvind Kejriwal-a ngaihdan hi a thlawp thu a sawi a, Delhi CM chu politics kalphung her danglamtu nia sawiin, politics kalphung tha zawk an duh a nih chuan  Kejriwal -an Pi Dikshit-i a khin ngei chu tha a tih thu a sawi a ni.
—————–

PM, Dr.Manmohan Singh chuan Assam-in harsatna a tawh leh a mamawh zualpuite chu a ngaihtuah tur thu a sawi a, he state atanga Rajya Sabha member atana thlan nawn leh a nih hnuah he thu hi sawiin, eptu pawlte leh All Assam Students Union-in he state tana tangkaina nei lo lutuka an puhna chu a dik lo tih an hmu dawn niin state CM, Tarun Gogoi chuan a hrilh a ni. Puan tawh angin, Dr.Singh-a hi a zawna a tum 5-na atan Ningani khan kum 6 dang atan thlan zui leh a ni a, Zirtawpni khan Bangkok atanga New Delhi a thlen hnu lawkah Pu Gogoi-a hi phone-a biain, Assam mipuite chunga a lawm thu leh, an tan a tih theih sang ber ti ve tura bat nasa tak neia a inngaih thu a hrilh a ni. MP atana thlan zui a nih hnu, Ningani tlai khan thuchhuah siamin PM chuan Assam-in amah a duhsakna chu a tan chuan thil lawmawm tak a nih thu sawiin, kum 1991 atang khan he state atang hian MP atan thlan a ni tawh tih a sawi a, state mipuite laka a tih tur hlen ngei tura theihtawp chhuah a tum thu a sawi a ni.
———-

Defence Research and Development Organisation (DRDO) hotu thar atan scientist hriat hlawh tak, Avinash Chander ruat a ni. DRDO-a Missiles and Strategic Systems Chief Controller ni mek, Avinash Chander hi India ralthuam chhuanawm tak,
Nuclear ralthuam phur thei, Agni missile duang chhuaktu nia sawi a ni a,  DRDO-in ralthuam a siam chhuah chi hrang hrangah sulhnu hnu tam tak a nei tawh a, DRDO hotu hna hi kum 3 a chelh ang. Avinash Chander hian Defence Minister Scientific Adviser  hna te, Defence  Department-a Secretary hna leh DRDO Director General  hna a chelh vek dawn a,  DRDO chu hma thar kaipui ngei a tum thu a sawi.
—————

Chhatisgarh-a Congress President, Nand Kumar Patel-a chu Maoist hel hovin an kah hlum hnuah state PCC President thar atan Charan Das Mahant ruat a ni a, amah hi Korba bial MP a ni. Puan tawh angin, thla hlui ni 25-a Maoist hel hovin Congress hruaitu tam tak an thah tumah khan state PCC President pawh a thi tel a, ram puma politician lar, Vidya Charan Shukla pawh na taka a hliam avangin Gurgaon damdawi inah dah mek a ni. Chhattisgarh-a Congress party hian Maoist hovin an hruaitute an lambunna hmun ngei atangin an party kawng zawh, “Parivartan Yatra” chu chhunzawm leh an tum thu an puang a ni.
———–

Union Home Minister, Sushil Kumar Shinde-a chuan Chhattisgarh-a Bastar bial chhunga Maoist hel ho beihnaah sawrkar laipui leh state sawrkarin theihtawp an chhuah dun dawn tih a sawi a, Chhattisgarh  khawpui, Raipur-a sawrkar hotu lute nena an thut khawm hnuah thuthar lakhawmtute biain, Union Home Minister hian thla hlui ni 25-a Maoist hel hoin Congress hruaitute leh anmahni zuitute lambuna pawi an khawih theih chhan chu National Investigation Agency-in an chhui mek tih a sawi. Union Home Minister hian hel ho kut tuara thi, Congress hruaitu, Nand Kumar Patel-a chhungte chu an chenna, Nandeli khuaah a tlawh a, Ramkrishna Care Hospital-a hliam enkawl mekte pawh a tlawh bakah state sawrkar hotute nen hel laka himna tur chungchang an sawiho bawk. Hel ho kut tuara hliam zinga pakhat, Congress hruaitu, Mahendra Karma-a vengtu, Siyaram Singh pawh a hliam tuar lo-in a thi ve leh a, amah enkawltu, Dr Sandeep Dave chuan a taksa bung hrang hrangin hna a thawh theih loh avangin Siyaram Singh hi a dam chhuak zo ta lo niin a sawi a, hliam an enkawl dang 10-te chu an ngaihtuahawm lo niin a sawi bawk.
————-

Manipur-a hel 2 chu sipai kutah an inpe a, hengte nen hian kumin chhungin sawrkar kuta hel inpe chu 50 chuang an ni tawh a ni. sawi danin, an ralthuam nena sipai kuta inpete hi, Kangleipak Communist Party (KCP) mi, Kh Tombi leh hel pawl dang, Kanglei Yawol Kann Lup (KYKL) mi, S Rakesh-te an ni a, Kh Tombi  hian kum 2005 khan hel pawl zawmin, Myanmar-a Tamu Camp-ah ral beih dan a zir thin a, an pahnih hian an silai, revolver 1 ve ve nen sipai kutah an inpe a ni.
—————

Khualzin phur Air India thlawhna-a thawk, Bhavik Shah chu sikret bawm 50 a ken avangin London police-ten an man a, a hna atanga chawlhtir nghal a ni. Mumbai atanga London pana thlawk, khualzin phur thlawhna-a chuang, Bhavik Shah hi Heathrow  tumhmun an thlen hnua Police-ten a thawmhnaw an enfiahna-ah sikret bawm 50 a pai tih hmuh a ni a, heng hi a ta ngei a ni tih a puan hnuah Police ten darkar 8 hreng zuiin Pound 5,000 an chawitir hnuah an chhuah a, he thil thleng avang hian a hna atanga chawlh lailawk tir nghal a ni.
————–

Both comments and pings are currently closed.

Comments are closed.

Powered by WordPress | Designed by: video game | Thanks to seo services, seo service and Etiketten drucken