RAM PAWN CHANCHIN THAR

China rama ar sa sawngbawlna hmun kangah mi 119 an thi a, mi dang 54 vel an hliam. Xinhua news agency sawi danin, Beijing khawpui hmar chhak lama Dehui khuaa ar vulhna leh talhna hmun hi Jilin Baoyuanfeng Poultry Company enkawl a ni a, hnathawktu mi 1,200 vel an chhawr thin na-in, tukina kangmei chhuah lai hi chuan mi 350 vel an awm nia hriat a ni. Kangthelh pawl pawhin theihtawp an chhuah mah se, he hmun-ah hian rikrum thila insasengna tur a awm that loh avangin an duh angin hna an thawk thei lo a ni. Kangmei chhuah chhan tak hi hriat a la ni lo a, CCTV-a a lan dan chuan hnathawktute an inthlak laia chhuak nia hriat a ni a, kangmei chhuah lai hian electric nia hriat tum 3 vel a puah avangin electric kal sual vanga he kangmei hi chhuak a nih rin a ni. He vanduaina thlenga hliamte hi damdawi inah enkawl an ni a, hliam zingah hian ngaihtuahawm tak tak an la awm a, kangmei chhuahna hmunah pawh hian ruang zawn mek a ni.  He biala kang thelhtute chuan sa sawngbawlna khawl tihdaihna-a an hman, boruak alh thei chi khat, ammonia putin kangmei hi a tichhuak nia an rin thu an sawi a, he hmun hi a chhung a hnawk nuai a, chhuahna a chep bakah a hma lam gate a inkalh bawk si avangin tlan chhuak duhte pawh an che thei lo niin an sawi bawk.  He kangmei hi chhun lai velah thelh fel a ni a, a sulhnu chhui mek a ni. He hmun atang hian khawpui hrang hrangah kum tin, ar sa sawngbawl sa, ton 67,000 vel an thawn chhuak thin a,  kum 2009 khan an din a, tunah chuan China ram khawpui 20 chuangah ar sa an thawn chhuak tawh a ni.
————-

Europe khawmualpui laili-a ram hrang hrangah ruah sur nasa avangin mi 4 an thi tawh a, mi 8 chin hriat lohin an awm mek. Ruah sur hian Austria, Germany leh Czech Republic-ah harsatna a thlen nasa zual a, hmun thenkhatah chuan tuilian-in a chim san ber tum an tawng mek a ni. Hmun himah mi tam tak thiar chhuah an ni  tawh a, lamlian leh rel kawngte pawh khar lailawk a nih bakah fimkhur thilah eng pek chhuah pawh tihtawp lailawk a ni. Czech Republic khawpui, Prague-ah chuan tui lian chim chin a san zel avangin lei hnuai rel kawng khar vek a nih tawh bakah dawr leh sikulte pawh khar a ni a, sahuana ramsa-te pawh hmun himah thiar chhuah an ni tawh bawk. Czech PM chuan tui lian avang hian cabinet thut khawm hmanhmawh koin, harsatna tawkte chhawmdawl dan tur leh inven dan tur an sawi ho a,  sipai 1,000 velin khawpui chhungah tui lian danna an siam mek a ni. Germany-ah pawh khaw chin zirtuten ruah tam tak a sur zui zel dawn ni a an sawi avang leh an lui liante pawh hlauhawm chhinchhiahna pela an luan theih mai dawn avangin lui kama khawpui pahnih, Passau leh Rosenheim-ah chuan sawrkarin emergency a puang tawh a ni. Austria sawrkar chuan thla 2 chhung vela ruah tui an dawn thin zat chu ni 2 chhungin a sur niin an sawi a, tui lian vanga harsatna tawkte chhawmdawl turin sipaite pawh hmun hrang hrangah tirh an ni tawh a ni.
—————-

Taiwan President hlui, eiruk avanga tang mek, Chen Shui-bian chu a tanna hmuna intihhlum a tum lai hmuh a ni a, tang vengtuten an chhanchhuak hman niin Justice Ministry chuan a sawi. Kum 2000 atanga 2008 chhunga Taiwan President, Chen Shui-bian hi ei ruk thubuaiah thiam loh chantir a nih avangin Taichung tan inah a tang mek a, nizan khan bual in-ah inhruk puan hmanga inawh hlum a tum lai chu tang vengtuten an chhanchhuak a, tunah chuan a ngaihtuahawm tawh lo niin an sawi.
—————-

Egypt rama Court sang berin an rama sorkar ding lai chu dik lo taka thlan tlin niin a sawi. Supreme Constitutional Court chuan  ram danpui thar duang tura tih, member 100 awmna Parliament – Shura Council member-te chu dik lo taka thlan niin a sawi a, heti chung hian inthlanpui awm leh hma chuan thlak an ni dawn lo niin a sawi. Egypt ramah hian rorel lai, President Mohammed Morsi-a kaihhruai, Freedom and Justice party chu Muslim mite duhsak bika rorela puh a nih avangin sakhaw dang betuten an sawisel nasa hle a,  inthlanpui-ah pawh dan lova thil ti-a hnehna chang-ah puhin an lungawi loh thu Court-ah an thlen a, Court chuan, eptute  puh ang hian rorel lai party hian thuneihna an chan theih nan dik lo takin thil ti mah se,  inthlanpui awm leh hma chuan Parliament hi thiah a nih loh tur thu leh, inthlanpui neih hun tur pawh ruat thuai a nih tur thu a sawi a ni.
————-

Palestinian Authority President, Mahmoud Abbas-a’n PM thar atan West Bank University President ni lai, Rami Hamdallah a ruat. Palestinian PM a nihna atanga kumin April thla laihawla bang, Salam Fayyad-a thlaktu tur, kum 54 mi, Rami Hamdallah hi Britain rama Lancaster University atanga doctorate degree nei a ni a,  Politics-ah dai hriat la nei lo anga sawi a ni nain, Mahmoud Abbas-a  kaihhruai Fatah-ah thuk taka inhnamhnawih tawh nia sawi a ni. Palestinian-te chenna Gaza biala roreltu, Hamas thupuangtu, Sami Abu Zuhri chuan West Bank-a sawrkar thar siam tura PM ruat a ni chu dan kalh nia sawiin, President  Mahmoud Abbas-a chu ram inpumkhatna tur kawng dang luiah a puh a ni. Palestinian ho hi pawl pahnih rorelna hnuaiah an awm a, Gaza-ah Hamas ho-in ro an rel a, West Bank-ah Palestinian Authority-in ro an rel thung a, thla hlui khan pawl pahnih hruaitute hi Cairo-ah inbiain, rorelna pakhat hnuaia Palestinian mite an awm theih nan thla 3 chhunga sawrkar intawm siam an remti a, an inremna hi tihpuitlin a nih dawn leh dawn loh erawh chu hriat a la ni lo a ni.
————-

Afghanistan ram khawchhak lama bazar pakhata bomb puakah zirlai 9 leh Police 1 an thi a, bomb tipuaktu hian he hmuna US sipai veivakte tihhlum tum mah se,  America mi an thih leh thih loh hriat a ni lo. Bomb topuaktu hi motor cycle-a chuang nia hriat a ni a, chhun lai vela America sipaiten he bazar an pal tlang laiin bomb hi a tipuak a, hetih lai tak hi a bula sikul naupangte, chaw chhun ei tura an chhuah lai a nih avangin naupang 9 lai an thi a ni.
———

Syria President, Bashar al-Assad-a chuan Russia hnen atangin thlawhna kahna, S-300 missile dawng tawh anga ngaih theihin thu sawi mah se, Russia chuan a la thawn loh thu leh, a thawn hun tur pawh hi tihkhawtlai emaw, sut leh hial emaw theih a nih thu a sawi a, Russia rama chanchinbu pakhat, Vedomosti chuan Russia Defence Industry hotute thusawi sawi chhawngin, kuminah pawh S-300 hi an thawn lo mai thei tih leh, ruahman danah pawh kum 2014 laihawl vela thawn tura tih chauh niin a sawi. Interfax news agency pawhin he ralthuam hi thawn a nih dawn pawhin, favang hma chuan thawn a nih a rinawm loh niin a sawi a, nimin khan President Assad-a hian Al-Manar TV hnenah, S-300 thenkhat hi dawng tawh ang hialin insawi tawh mah se, hei hi thu dik lo niin a lang ta a ni.
—————-

Hetih lai hian US leh Germany ramte chuan Syria sipaite ralthuam pe lo turin Russia an phut a, US Secretary of State, John Kerry leh US tlawhtu, German Foreign Minister, Guido Westerwelle chuan thuthar la khawmtute an kawmnaah Syria sawrkar hnena ralthuam petu nia sawi, Russia chu an dem thu an sawi. John Kerry chuan, Syria sawrkar sipaite hman atan Russia-in ralthuam tha a pe leh a nih chuan Israel ram dinhmun  chu a derthawng hle dawn ni-a sawiin, Syria sawrkar nen ralthuam lei chungchangah inremna thu lo thlung tawh pawh ni se, Russia sawrkar hian tihlawhtling rih lo se an duh thu a sawi. German Foreign Minister Guido Westerwelle pawhin Syria ram buaina a tawp theih nana inbiak dan ngaihtuah a nih laia boruak tha lo thlen thei zawnga Russia-in Syria sawrkar ralthuam pek a tum chu tha lo a tih thu a sawi a, inbiakna tithuanawp thei zawnga che lo turin Russia sawrkar chu an phut thu a sawi.
————

Turkey sawrkarin an khawpui Istanbul-a mipui len khaw thawnna hmun pakhat, Gezi Park-a in sak a tum avangin ram pumah sawrkar laka lungawi lohna lantir a ni a, mi 1,700 chuang man an ni tawh. Puan tawh angin, Gezi Park hi khawpui chhunga thing hring din tamna hmun an neih chhun a ni tawh niin mipui lungawi lote chuan an sawi a, sawrkarin thing tam tak kita he hmun cheibawl a tum dan chu an duh lohzia lantir nan Zirtawpni atang khan he Park-a hnathawk turte dan nan Park chhungah hianawm hmun an khuar a, police-ten hnawh darh tuma an beihnaah buaina a chhuah zui avangin mi tam tak an hliam a, he thil thleng hi khaw dangah kang kai zelin, ram pumah sawrkar duh lohna lantirin mipui an nuar tawh a ni. Mipui lungawi lote hian PM, Recep Tayyip Erdogan-a kaihhruai sawrkar chu a thuneihna hmang suala an zalenna rap betah leh mimal duh dana rorel tumah an puh a,  Gezi Park-a thil thleng hi remchanga hamngin khaw 67 velah sawrkar duh lohna lantira pun khawm huaihawt a ni tawh a, Zirtawpni atanga Istanbul khawpuia mipui lungawi lo leh police inkara buaina chhuakah mi 484 an hliam tawh a ni.
————–

Zuk leh hmuam zalenna thin, Russia ramah mei zuk khap tan a ni dawn ta a, Russia hi ram hrang hrang dinhmun enin mei zu tamna ber zinga mi a ni a, a mi cheng za-a 40 velin mei zu a ni. Sikret man pawh a tlawm hle a,  rei tak chu mipui pun khawmna hmunah pawh zalen takin mei zuk theih a ni na-in, kumin February thla khan puipunna hmuna mei zuk khapna dan thar chu President Vladimir Putin-an a pawm ta a, vawiin atang khan he dan hi hman a ni ta a ni. He dan tharah hian hnathawhna hmunah te, bus leh rel bakah rel chawlhhmun leh tumhmun bul hnaiah mei zuk khap a ni tawh dawn a, hei bakah hian vaihlo atanga thil siam chhuah fak pawh khap vek a ni tawh dawn a, nakkum atangin he dan hi mipui pun khawmna hmun dangah pawh khauh zawka lek kawh a ni dawn a ni.  PM, Dmitry Medvedev chuan nikum chhung khan vaihlo hman avanga natna chi hrang hrang avangin an ramah hian mi 4,00,000 vel an thi niin a sawi a, President Vladimir Putin-a chuan chuan he dan thar hi mipuiin hriselna lama hma an sawnna tur leh sum dinhmun siam thatna atan pawh thil tangkai tak a nih an beisei thu a sawi.
————–

Afghanistan rama Nato sipai hotu hlui, John Allen-a chuan Afghanistan atanga US sipaite, nakkuma lak chhuah tumna chu sut leh a duh thu a sawi. Afghanistan-a ram dang sipai hotu hna, kum 1 leh a chanve thawk tawh,  John Allen-a hian President Barack Obama -a lo ruahman tawh angin nakkumah Afghanistan ram US sipai tam zawk chu lak chhuah an nih pawhin, sipai 13,600 vel tal dah zui a duh thu a lo sawi tawh a, Afghanistan-ah hian kum 2014 hnuah kum 3 dang tal, sipai dah zui tul dawna a hriat thu sawiin, vawi khatah an chhuahsan vek a nih chuan a ngaihtuahawm lutuk dawn niin a sawi. Afghanistan atanga Nato sipaite lak chhuah chungchangah hian President Barack Obama leh NATO Secretary-General, Anders Fogh Rasmussen chuan nakkum-ah ram hrang hrang aiawhten sawiho leh se an ti a, hetah hian Afghanistan ram dinhmun thlir chungin Nato sipaite lak chhuah tumna chu tih puitlin theih a nih dawn leh dawn loh sawi ho a ni anga a, thut khawm hun leh a hmun tur chu NATO Secretary-General-in a ruahman dawn a ni.
—————–

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken