NEWS

MNF President, Pu Zoramthanga’n ramri hung chungchanga dik lo taka zangnadawmna pek a nih dan, CBI-in a chhui theih loh tura lehkha pawimawh haltu-a a puh, CADC Executive Member-te chu thubuai siamsaka man tur leh, CADC chu thiat turin Larsap a ngen. Pu Zoramthanga hian vawiin tlai khan Larsap, Pu Vakkom Purushothaman chu Raj Bhavan-ah hmuin India leh Bangladesh ramri hungna avanga zangnadawmna pek chungchangah Chakma Autonomous District Council hotute’n anmahni leh an chhungte tan pass lem siamin Rs. 11,00,00,000 zet an la niin a hrilh a, he thil hi CBI-in a chhui mek avangin, a finfiahna thai bo turin CADC Executive Committee chuan thupek siamin kum 1972 atanga 2005 inkara Land Revenue & Settlement hnuaia sorkar lehkha pawimawh zawng zawng chu kum 2010 September ni 17 khan District Council Revenue Office kawtah an hal vek niin a sawi. Pu Zoramthanga chuan, he thil thleng hi CADC CEM, Pu Kali Kumar Tongchongya-a hriatpuina-a tih nia a sawi bakah, amah ngeiin halna thupekah hian a hming a ziak niin Larsap chu a hrilh bawk. Pu Zoramthanga chuan, hemi kum inkara lehkha pawimawh zawng zawng, computer-a lo dah thatte pawh CADC Executive Committee thu ang hian tihchhiat vek a ni a ti a, heng lehkha pawimawh an hal zawng zawngte hi kum 1972 atanga 2005 inkara mi mai ni lovin, kum 1972 hma lama Pawi-Lakher Region an nih laia lehkha pawimawh an kawl zawng zawng pawh a huam vek avangin he thil hi ngaihthah mai chi ni lo-a a hriat thu, Larsap hi a hrilh a, hetianga sorkar lehkha pawimawh zawng zawng hal vek mai hi sorkar laipui chanchinah pawh thil la awm ngai lo a nih a rin thu sawiin, ngaihtuah chian poh leh a tenawmin a rapthlak niin a sawi. MNF President chuan heng lehkha pawimawh haltute hi criminal case awrhtir a, CADC Executive Committee Member zawng zawngte chu man vek turin Larsap chu a ngen a, CADC pawh a thuneihna hmanga thiat nghal turin a ngen bawk. Pu Zoramthanga thu thlen hi Larsap chuan a ngaih pawimawh thu leh, lo en zui a tum thu, Pu Zoramthanga chu a lo hrilh nia thu dawn a ni.

Hemi hma hian Pu Zoramthanga hian Mizo Hnam Runah thuthar la khawmtute kawmin, hemi chungchang hi a hrilh a, CADC Executive Committee thil tih dan hi a rapthlak hle nia sawiin, hetiang hi ram chhung hmun dangah a thlen ve pawh a hriat ngai loh thu a sawi a, criminal case lian tak ni-a a hriat thu a sawi bawk. Zawhna chhangin Pu Zoramthanga chuan, President thlan turah an Party chuan Pu Pranab Mukherjee-a nge PA Sangma an thlawp dawn tih an la sawi lo niin a sawi a, tun kar chhung hian Core Committee leh PAC thu khawmin thutlukna an siam dawn niin a sawi. ‘Rawtuai hak’ tih tawngkam chungchang zawhna pawh chhangin Pu Zoramthanga chuan, hei hi Pu Lal Thawnhawla sawi a ni a ti a, tun hnaia Congress Bhavan-a Pu Lal Thanhawla’n he thu sawitu-a amah a puh let chu thu dik lo nia sawiin, Pu Hawla tawngkam ngei niin a sawi. Pu Zoramthanga chuan ramhnuaia an awm lai khan Pu Hawla nen hian inbe ngai lo mah se, an mamawh chu an dil ngei thin thu a sawi a, mahse direct-in Rs. 6,00,000 an dil lo niin a sawi bawk. Pu Zoramthanga chuan, kum 2013 inthlanpuia an Flagship programme tur pawh an duan peih tep tawh niin a sawi a, an Flagship programme chu NLUP ang mai maia pawisa inpeka duh duh in thawhtir ang hi a ni dawn lo niin a sawi. NLUP chu pindan pakhata zirlai naupang khung khawm a, pencil leh lehkhapuan pek a, an duh duh ziahtir nena tehkhinin Pu Zoramthanga chuan naupangte chu tha taka zirtir an nih loh chuan an puitling dawn lo ang bawkin, NLUP dawngtute pawh sorkar-in a enkawl zui loh chuan eng an ni lo dawn lo niin a sawi. Sorkar hnathawk hun pawhsei chungchang zawhna chhangin Pu Zoramthanga chuan, pension tawh hun pawhsei sak lutuk chu tha a tih loh thu a sawi a, hna laklawh avanga pawh seite chu awm bawk mah se, duhsak bik neih avanga pension tawh pawh sei nasat lutuk chu tha a tih loh thu a sawi a ni.

Hetih lai hian Chakma Autonomous District Council Chief Executive Member, Pu Kali Kumar Tongchongya chuan tun hmaa file hlui thenkhat leh form hlui thenkhat, hman tlak tawh lohte chu dan anga an tihchhiat thu te, District Council Land Record chu Computerised mek a nih thu te, thil engkim lang tlang theia siam nan CADC website-ah thun tum a nih thute a sawi a, heta tana order chhuah hi Chakma District MNF President, Pu Rasik Mohan-a leh a hote chuan duh lovin District Council Office tualah tun thla ni 11 khan an hal niin a sawi a, sorkar record pawimawh tichhe zawngin a kaihhruai District Council chuan thil a ti lo niin CEM chuan a sawi bawk.
——-

Mizoram Legislative Assembly Budget session, July ni 16 atanga tan tur programme kimchang chu vawiin khan Speaker, Pu R.Romawia hova Business Advisory Committee thukhawmin an duang fel ta a, ruahman dan chuan session hian July ni 16 atanga August ni 2 thleng a awh ang. Sorkar kum kal mek, kum 2012-2013 Budget puitling chu session tan ni hian Finance Minister, Pu H. Liansailova’n House-ah a pharh ang a, ni 17 leh 18-ah sorkar thil pawimawh ngaihtuah a ni ang a, a tuk, July ni 19 chu President thlan ni tur a nih avangin session a awm lo vang a, MLA leh MP te’n hemi ni hian President thlannaah vote an thlak dawn a ni. A tuk, July ni 20, Zirtawpni-ah chuan Private Member’s Business ngaihtuah a ni ang a, a tuk, ni 21 leh 22 chu Inrinni leh Pathianni a nih avangin session chawlh a ni ang. July ni 23, Thawhtanniah leh a tuk, ni 24, Thawhlehniah Budget, a tlangpuia sawiho a ni ang a, July ni 25 atanga ni 31 thleng, Minister-te hna chanpual enkawlna atana sum ruahman sawihova pass nan hman a ni ang. Minister-te sum mamawh hi pass thuai a ngaih avangin July ni 27, Zirtawpni-ah pawh Private Business ngaihtuah lovin Minister te demand sawihova pass a ni ang a, hemi ni-a Private Business neih loh aiah hian August ni 1, Thawhtanniah Private Member’s Business ngaihtuah zawk a ni ang. A tuk, August ni 2 chu sorkar thil pawimawh ngaihtuahna atan hman a ni ang a, hemi ni hian Budget Session chu zawh fel tum a ni dawn a ni.
——–

HPC(D) ten |inghmun leh a chhehvel khaw 12 atanga tihluihnaa chhiah an khawn, Rs.3,94,250/- chu Inrinni khan Mizoram Police-ten |inghmun khaw VC Vice President, Pu B. |hachhunga kut atangin an man a, hemi rual hian Pu B. |hachhunga pawh hi man nghal a ni. Aizawl District SP, Pu Lalbiakthanga Khiangte hnen atanga thu dawn danin Police-te hian an thu dawn bawhzuiin HPC(D) ten khaw hrang hrang atanga tihluihna-a chhiah an khawn hi an um zui zel a, HPC(D) hotute kuta a luh hma-in an mansak ta a ni. Police hotute chuan he sum thawh khawm nia sawi leh a petute hi an chhui zui dawn a, chumi hnuah chuan engtia kalpui zel tur nge tih a hriat theih chauh dawn niin an sawi.
——–

Tukin dar 4:15 vel khan Bungkawn Lai House dawlna lungrem a chim a, a thlanga mi pathum In, chhungkaw 7 luah lai chu luah zui ngam a nih loh avangin an inthiar chhuak a ni. ZONET thu dawn danin, Lai House dawlna lungrem chim hian a thlanga Pu Lungmuankima, Pu T. Lawmkima leh Pu J.R. Sangluaia In te chu a tichhe thelh a, Pu T. Lawmkima te In bang thenkhat phei chu a deng keh a, lungrem chim hian In hi deng chiah lovin an kawt a hnawh vek a ni. Lungrem chhim thlang zawna In pathumte hi chhungkaw 7-in an luah a, ruahtui a la tlak reng avangin In hi luah zui ngam lovin an inthiar chhuak nghal vek a ni. Lai House hi a sak lai atangin a tha tawk lo nia thu dawn a ni a, chhawng 7-a sanga sak a ni a, a chung chhawng hnih phei chu thuneituten thiat turin an lo ti tawh a, sum harsatna avangin tun thleng hian thiah a la ni lo nia thu dawn a ni. A kawmthlang dawlna lungrem ber a chhiat tawh avang hian Lai House thlang, Bungkawn Vengthara awmte pawhin an In riah rauhsan an tum mek bawk. He lungrem chim hi tukin zing kar atang khan khawtlang mipuiten hnatlangin an seng hawi a, a min lai chu silpauline-in an khuh nghal bawk a, bungraw thiar chhuah ngaite an thiar chhuahpui bawk a ni.
———-

Nimin khan CADS duty-te’n Sihphir daiah parvon spas, mum 20,000 an man a, hei hi Rs. 5,00,000 man vel nia chhut a ni. Central YMA hnuaia ruihhlo do pawl, Central Anti Drugs Squad duty-te hi an thu dawn bawhzuiin Inrinni zanlai pelh hnu, zing dar 1 vel khan Siphir daiah an duty a, Silchar atanga motor pakhat lo chho chu dapin Parvon spas mum 12,400 an man a, a neitu, Lalmalsawma, Lalzamliana fapa, Bawngkawna cheng ni-a insawi, Burma mi chu an man nghal a, a motor-a woofer chhunga a lo thuhruk, mum 7,600 pawh an man leh a ni. CADS-te chuan heng damdawite hi Rs. 5,00,000 man vel niin an sawi a, a neitu nen hian Excise & Narcotics kutah an hlan a ni.
————-

Sorkar Primary School leh Middle School-a naupang chaw chhun pek thin chungchanga thil awm dan dik tak awlsam taka hriat theihna turin vawiin khan District tina SSA hnuaia mid day meal enkawltu Officer te chu Management Information System (MIS) Web Portal training pek an ni. He training hi School Education Deptt. Conference Hall-ah buatsaih a ni a, sorkar laipuia Human Resources Development Ministry-a Consultant, Dinesh Pradhan leh Under Secy., Pi V. Jayanthi-ten training hi an pe a ni. Management Information System Web Portal hi thingtlang khua thlenga naupang chaw chhun pek dan hriat zung zung theih dan tur leh hnathawh dan that tawk leh tawk loh en zui theihna tur a ni a, he training hi Joint Director, Pu B. Lalchhuanliana, State Nodal Officer ni bawkin a kaihruai a ni.
——–

Ram chhunga Doctor inzawm khawm pawl, Indian Medical Association (IMA)-in sorkar dan thar duan an duh loh entir nana ram puma lungawi lohna ni, One Day Token protest an hman chu IMA Mizoram Branch pawhin hmang ve-in vawiin khan badge dum an bel. IMA hian sorkar dan thar duan thenkhat chu Doctor-te dikna leh chanvo hrek behna leh an zalenna tibo thei tur niin an ngai a, hemi avang hian ram pumah damlote tawrhna thlen lo turin badge dum belin lungawi lohna hi an lantir a ni. IMA Mizoram Branch member-te chuan vawiin khan an hnathawhna ah badge dum hi an bel a, chawhnu lamah Aijal Club-ah General Body Meeting neiin tuna lungawi lohna an lantir chungchang hi an ngaihtuah nghal a ni. Mizoram doctor-te chuan IMA Hqrs.-in lungawi lohna a lantir hi an thlawp thu leh, sorkar laipui pawhin Medical Council of India dan thar duan hi ennawn leh ngei se an duh thu te, Clinical Establishment pawh Mizoram mila siam ni se an duh thu an sawi bawk.
————-

Chaltlang Branch YMA chuan Chaltlang Dingdi veng nula, Laldangpuii’n May ni 31 zana tawh sual rapthlak tak a tawh chu misual kut thlakna ngei niin an hria a, hmeichhe awm nem leh chak lo zawk thah duh hial khawpa kut inthlakna thleng a chu rapthlak an tih thu leh hetiang hi tun hnuah chuan thleng tawh lo se an duh thu, thu chhuah siamin an sawi. He nula kut thlaktute hi man a, an phu tawka hrem ngei turin Chaltlang Branch YMA chuan Police-te a ngen bawk a ni. Laldangpuii hi May ni 31 zan khan Chanmari leh Chaltlang inkar kawng sir khama in rel atangin a tla nia sawi a ni a, a ban a chhum hmawk a, a khabe ruh a tliak bawk a, a hliam hi na hle mah se, vanneihthlak takin thi lovin zawi zawiin that lam a pan chho zel a, tunah phei chuan a tawng thei leh tawh a ni. A ban hliam pawh hi a dam sawt hle niin Police-te chuan an sawi a, amaherawhchu, khami zana a chunga thil thlen dan kha fiah takin a la hre chhuak thei lo niin an sawi.
———

Tunlai hian Lunglei Civil Hospital-ah naupang Ward-a leng lo khawp naupang damlo an awm a, Hospital atanga kan Corr. thu dawn danin, Paediatric Ward-ah hian naupang 24 an awm bakah ENT leh Male Surgical Ward thlengin naupang damlote hi dah an ni a, an vaiin 35 vel an ni. An natna hi Pneumonia, kawthalo, luak leh malaria te nia thu dawn a ni a, tunlaia Lunglei khawpui leh a chhehvela hetiang natna a tamna chhan hi khaw awm dan dik loh vang nia rin a ni.
——-

Tukin khan Aizawl atanga Lunglei panna kawng, World Bank Road chu Kanghmun South bulah lei minin a hnawh ping a, amaherawhchu, hei hi JCB hmangin lirthei chi tin kal theiha siam tlang a ni leh tawh a ni. Hemi bakah hian Lunglei atanga Tlabung panna kawngpui pawh Rahsi veng bulah lei minin a hnawh ping a, hei hi then nghal a ni a, lirthei chi tin kal theiha siam tlang a ni leh tawh bawk.
——-

Cachar District-a Sonai Road tia hriat, Rangirkhari Police Station leh Aulia Bazar-a Nagatilla inkar kawng chu tukin dar 6 atang khan tiam chin awm lova dan pin a ni. Kawng dangtute hi Sonai Road Union Sangstha an ni a, kawng chhe lutuk siam tha thuai tura sorkar phutin kawng hi an dang a ni. Silchar LO, Pu James Lalrinchhana chuan kawng danna hmun hi hel turin zin veivakte a chah a, Gungur Medical Hospital atanga Silkur-Sildubi kawnga kalin a hel theih niin a sawi.
——–

Institute of Applied Systems & Rural Development (IASRD) leh Rotary Club of Aizawl buatsaihin vawiin khan Bio-Fuel leh Green Energy pawimawhna chungchang, I&PR Auditorium-ah sawi ho a ni a, he seminar hmanpuitu, State Planning Board Vice Chairman, Pu Lalkhama chuan leilung hausakna hi mihringte mamawh phuhru turin, daih chin nei tura duan a nih thu a sawi a, mihring khawsakna lo sang zel hian energy mamawhna a tihpun rualin leilung hausakna, tuialhthei leh lungalhtheite nasa taka hai chhuah a nih avangin khawvel leh boruakah nghawng tha lo tak a nei mek a ni, a ti bawk. IASRD Chairman, Dr.K.D.Gupta pawhin India ram-in bio-fuel leh green energy lama tan lak a mamawh hle tih sawiin, India ram-in tuialhthei a mamawh za zela 83 chu ram pawn atanga lak luh a ni, a ti a. India ram chu khawvela energy mamawh hnem ber ram 6-na a ni mek a ni a ti bawk. He seminar hawnna inkhawm hi
Pu Dunglena’n a kaihruai a, chawhnu lamah mi thiamten thu an sawi a ni.
————–

Vawiin khan Booth Level Officer-te tana buatsaih, Training of Trainers, ni hnih awh tur chu Agriculture Conference Hall-ah Chief Electoral Officer, Pu K.Riachho-a’n a hawng. He training hi Aizawl, Mamit, Kolasib, Serchhip leh Champhai District-ah buatsaih a ni a, CEO chuan, nakkum January ni 1-a kum 18 tling thar zawng zawng thun turin Electoral Roll Special Summary Revision neih a ni dawn tih sawiin, Electoral Roll ennawn hi kum tin neih thin ni mah se, nakkum November thlaah Mizoramah Assembly inthlan a awm dawn avangin tun tum hi a pawimawh lehzual dawn hle tih a sawi. Roll ennawnna-a thawktu zawng zawngte chu a theih chen chenah inthlan lam hawi dante zir chiang tur leh, Election Commission of India-in inkaihhruaina dan a siamte chiang taka hre turin a chah a, hnam leh chi bing lam rilru pu lo tur leh dik tak leh huaisen taka India khua leh tui, kum tling chin apiang chu hmaih awm hauh lo-a Roll-a thun vek turin a chah bawk. Training hawnna inkhawm hi Jt. Chief Electoral Officer, Pu H. Lalengmawia’n a kaihruai a, Lunglei EO, Dr Andrew H.Vanlaldika, ACEO, R. Vanlalsawta leh Saiha EO, H. Lalhmingthanga ten inthlan chungchanga thil pawimawhte an zirtir a ni.
————

June ni 26 hi International Day Against Drug Abuse & Illicit Trafficking a ni a. Hemi pual hian tukin khan kawng zawh a ni. Kawng zawh hi Chanmari leh Sikulpuikawn atanga tanin Vanapa Hall-ah an intawk khawm a, YMA Branch 25 atangin member engemawzat an tel a ni. Vanapa Hall-a inkhawm tawi buatsaihah Central YMA President, Pu T. Sangkunga leh Assam Rifles 23 Sector Commander, Brig. S.P. Rawat-a’n thu an sawi a, he kawng zawh hi Social Welfare Department, MSACS, UNODC, Sports & Youth Department, Home Department, Health Department, Excise & Narcotics Department leh Central YMA buatsaih a ni.
———

Vawiin khan Aizawlah khaw lum lai berin Celsius Degree 21.6 a ni a, a vawh lai berin degree 19.4 a ni. Hemi chhung hian ruah milimetre 45.3 a sur a ni. Boruak hi a ro lai berin za zela 72.4 a ni a, a hnawn lai berin za zela 98.3 a ni.
———

Naktuk, Thawhlehni-ah chuan ruah a sur rin a ni a, khaw lum lai berin Celsius degree 23 vel, a vawh lai berin degree 20 vnel a nih rin a ni. Zing dar 4:34-ah ni a chhuak ang a, tlai dar 6:10-ah a tla leh ang. Ni rei zawng chu darkar 13, zan rei zawng chu darkar 11 a ni ang.
——–

Congress party chuan an hruaitu hlun ber pakhat leh party chhung leh sorkara harsatna ching feltu bera an neih, Pu Pranab Mukherjee-a chu an party atangin an thlah ta a, President thlanna a chuh dawn avangin party mi a nih zel a rem tawh lo a ni. Pu Mukherjee-a hi vawiina Pi Sonia Gandhi-i ina CWC thut khawmnaah thlah a ni a, naktukah Congress party member a nihna pawh a bansan rin a ni a, Finance Minister a nihna pawh a bansan nghal ang. Pu Mukherjee-a hi kum 50 deuhthaw, Congress member a lo ni tawh a, he party a han chhuahdan dawn ta chu a tan a lunglenthlakin, a nun pawh a ruak huai dawn niin a sawi. Vawiina CWC thut khawmnaah hian member 36 zinga 33 an kal a, Pi Sonia Gandhi chuan chuan Pu Mukherjee-a chu a lawmpui thu hrilhin, UPA-a party dangten an thlawp avang pawha lawmawm a tih thu a sawi. Pu Mukherjee-a hi kum 34 kal ta, 1978-ah daih tawh khan Congress Party thuneitu sang, CWC member a lo ni tawh a, kum 43 kal taah khan Rajya Sabha member a ni tawh a, kum 39 kal taah khan Union Minister a ni tawh bawk. Kum tam tak Rajya Sabha member a nih hnuah kum 2004 khan Lok Sabha member a ni ve tan chauh a, West Bengal-a Jangipur bialah thlan tlin a ni a, 2009-ah khan a bial ngai atang hian thlan nawn leh a ni. Tun tum President thlanna turah hian UPA member-te bakah eptu lam atang pawhin CPM, Shiv Sena leh JD(U)-in thlawp an tum avangin harsa lo taka tling mai tura ngaih a ni a, candidate dang langsar ve deuh tur, Pu Purno Sangma pawh BJP kaihhruai NDA-a pawl tam zawk leh, AIADMK leh BJD-in thlawp dawn mah se, a tling zo dawn lova ngaih a ni.
————-

Kum 2008-a Mumbai-a mi firfiakte pawi khawihnaa a bul tumtu ber pakhat, Sayed Zabiuddin, Abu Hamza tia hriat chu kum 3 chuang man tuma beih a nih hnuah man a ni ta a, amah hi Mumbai beitu mi firfiak 10, Hindi zirtirtu, Lashker-e-Taiba mi a ni. Kum 30 mi, Abu Hamza hi Delhi Police-ten Ningani khan an man a, an manna hmun leh an man dan hi chiang taka puan a ni lo na a, Saudi Arabia Intelligence lam mite puihna-in a awmna hi an hre thei niin an sawi. Home Minister, Pu P Chidambaram-a chuan, he mi hi mana khung a nih tawh thu a sawi a, External Affairs Minister, SM Krishna pawhin Delhi Police-te hlawhtlinna chu chhuanawm a tih thu a sawi. Amah hi Maharashtra, Beed dist.-a Georai khua a ni a, kum 2006-a Mumbai rela pawi khawihna, mi 180 thihnaah pawh khan mawh phura ngaih a ni a, Bangalore Police-te chuan Indian Institute of Science-a pawi khawihnaah pawh khan inhnamhnawihah an ngai bawk.
————-

National Defence Academy (NDA)-a thawk tur lak chungchanga thil fel lo chhuina-ah CBI-in sipai Colonel pakhat telin mi 6 an man a, heng mite hian LDC leh Group C hna dang pek tiamin mi thenkhat chu sum tam tak tak an lo laksak thin nia hriat a ni. Heng an mi rinhlelhte in an dapnaah hian CBI hian cheng vbc. 1 leh nuai 76 vel an man a, an mi mante hi NDA Commandant Staff Officer, Colonel Kulbir Singh leh thawktu dangte an ni. Colonel Singh-a hi Inrinni khan Colaba Military Station atangin man a ni a, mi dang 6 nen hian CBI court-a hruai an nih hnuah, July ni 2 thleng, Police kuta awm phawt tura tih an ni. Heng mite hian NDA-a hna thawh tur duhte chu cheng nuai 3 atanga nuai 4 vel thleng laksakin, hna hniam deuh pek an tiam thin nia sawi a ni a, hna lakna tura exam dawnah lehkha ruakah hming sign-tirin, chhanna dik sa vek lo ziah an tiam niin an sawi. Hmun hrang hrang an dapnaah hna lakna tur exam zawhna te, an pawisa lakna hmingte man a ni a, he thilah hian mi dang an inhnamhnawih em tih pawh en zui a ni ang. Heng mi mante ukil, Sudhir Shah-a erawh chuan Colonel Singh-a leh mi dang 5-te thil tih dan sawiselna leh hekna hi a lut lo hrim hrim niin a sawi a, tangka mante pawh hi thamna ngei a ni tih fiahna engmah a awm lo niin a sawi. Hna lak dawnah khan Colonel Singh-a hi a latute zinga a tel loh bakah, hna thawk tur lakna nena inkaihhnawih thil engmah a khawih lo niin a ukil chuan a sawi bawk a, NDA thuneitute chuan, he thil chhuitute chu an thlawp zel tur thu leh, an thil mamawh, lehkha pawimawh leh thil dangte pawh an pek zel tur thu an sawi.
——–

Maharashtra sorkar thuthmun, an pisa pui ber, Mumbai-a Mantralaya chu kangmei rapthlak takin nasa taka a tihchhiat hnuah vawiin atang khan he in-a hmun thenkhat chu luah leh tan a ni a, mei hian he in chhawng 7-a chhawng 4 chu a tichhe nasa hle a ni. State CM, Prithviraj Chavan leh Minister dangte chuan office an kai leh tan a, he kangmei chhuaka thi, mi 5 sunna hun te an hmang hlawm a ni. CM hi office hi a chhiat nasat avanga a luah theih tawh loh avangin he in chhawng khatna-a Health Minister Suresh Shetty-a office thin chu a luah rih a, Dy. CM pawhin chhawng hnihna-a Water Resources Minister, Sunil Tatkare-a office a luah rih bawk. State PWD chuan Mantralaya-a hmun tam tak luah theih a nih tak loh avang hian a bul hnaia in thenkhat chu Secretariat atana hman turin a cheibawl tan a, thla thum chhung chuan pangngai deuh taka hna thawh theih an inbeisei a ni.
————–

Tukin khan Srinagar-a sakhaw hmun pakhatah kangmei a chhuah avangin mipui thinrim leh Police an innawr buai a, Hazrat Shaikh Abdula Qadir Jeelani-a pawl ta, Sufi hmun thianghlim an tih chu tukin khan a kang a ni. Sorkar hotute chuan zing dar 6:30 velah khan, zing tawngtai hnu lawkah he in chung hi a kang tan niin an sawi a, a chhan erawh chu an la sawi thei lo a ni. He in hi thing deuh veka sak a nih avangin a kang ral vek nia sawi a ni a, mipui thinrim pung khawm chu Police ten mittui tlakna hlo leh tiangin an hnawt darh a, Police engemawzat telin mi 20 vel an hliam a ni. He hmun hi kum zali vel kal taa sak tawh kha a ni a, hmun thianghlima ngai tam tak an awm a ni.
———–

Pune-a Kulkari chhungkua an tih chu khawvela chhungkaw sang ber an nia sawi a ni a, an pa ber, Sharad Kulkarni, kum 52 mi chu feet 7 leh inchi 1 leh a chanve a ni a, a nupui, Sanjot, kum 46 mi pawh ft.6ft leh inchi 2.6 a ni. An fate pahnih pawh ft 6 leh inchi 1 leh ft.6 leh inchi 4 an ni a, an pali-a san zawng belh khawm hi feet 26 a tling a ni. Sharad-a leh Sanjot-i hi kum 1989 khan an innei a, Limca Book of Records chuan India rama nupa sang berah a puang tawh a, khawvela nupa sang bera Guinness Book of Records-in a chhinchhiah chu California-a Wayne lehLaurie Hallquist te nupa an ni. Kulkarni te chhungkua hi an len hlawm em avangin an pheikhawk tur pawh dawrah a awm lo a, Europe atangin an lei deuh ber a, an in chhung bungraw chi hrang hrang, kawngka leh tukverh, khum, thawmhnaw bawm leh inthiarna thlengin an san zawng mila siam vek a ngai a, thlawhnaa an chuan pawhin a thawl lai deuha thutna an dil zel a ni.
————-

Mohammed Morsi-a chu Egypt ram President thara thlan tlinah puan a ni ta a, nimin khan he ram chanchina inthlanna zalen berah Islamist President hmasa bera tlingah puan a ni. Inthlanna lam thuneitute sawi danin, Morsi-a hian Hosni Mubarak-a hnuaia PM hnuhnung ber, Ahmed Shafiq-a chu a hneh a, Morsi-a hian vote za zela 51.7 a hmu a, Shafiq-a hian zaa 48.3 a hmu thung a, vote tla hi za zela 51 a ni. Mahse Hosni Mubarak-a paihthlak a nih hnua thuneihna chelhtu, sipai hotute thil tih dan enin President hian thuneihna tak tak a nei ang em tih sawi a har hle a, President thar puan a nih hma lawk hian sipai lalte chuan thuneihna pum hmawm tumin thupek engemawzat an siam a, ram danpui siamna lam thlengin thuneih an tum a ni. Morsi-a chuan an ram chu Muslim rama siam tura tan lak a tum thu a sawi a, Muslim Brotherhood pawl nen pawh tha taka thawh ho a duh thu a sawi. Egypt ramah hian kum 60 kal ta chhunga President hnuhnung 4 chu sipai vek an ni a, tun hi tunlai Egypt ram chanchina mipui thlan, President an neih hmasak ber a ni a, United States-a zir, Engineer a ni.
———-

Tun hnaiah Turkey ram thlawhna pakhat, Syria-in a kah thlak avangin Turkey chuan NATO ram aiawhte thut khawm hmanhmawh koh a phut a, he thlawhna hi Syria ram chung boruakah a thlawh luh palh avangin Syria hian a lo kap thla a ni. Turkey hian a thlawhna hi enthlatu a nih loh thu sawiin, Syria sorkar hnenah a lungawi lohna a thlen tawh a ni. Zirtawpni kal ta khan he thlawhna hi kah thlak a ni a, nimin khan thlawhna tla keh them hi Mediterranean tuipuiah chhar a ni a, feet 3,281-a thukah chhar a ni a, a khalhtu ruang erawh chu hmuh a la ni lo. Britain Foreign Secretary, William Hague-a pawhin Syria ramin ram dang thlawhna a kap thla mai hi a tha lo hle tih a sawi a, UN-ah sawiho thaa a hriat thu a sawi bawk. He thlawhna hi Syria ram chung boruaka a thlawh luh palh hnuah a thlawk chhuak leh thuai a, Syria-in a kah lai phei hi chuan Syria boruak a chhuahsan leh tawh nia sawi a ni.
—————

Osama bin Laden-a thah a nih theih nana mi tangkai, Dr. Shakil Afridi-a chu Pakistan ram lung in pakhatah amah chauhin khung fal a ni a, a tanna hi hmun khawhar ber pawla sawi a ni. Hetianga khung fal a nih chhan hi hremna a nih bakah, a himna atan a ni pakhat a, Osama lamtang, he lung ina tang ve thoten kut an thlak mai hlauhthawnna a awm avangin mi dang tlawh pawh theih lohva dah a ni. Mi tangte chauh ni lo, tang vengtute pawh an hlauhawm theih avangin sipai rintlak pahnih chauhin Afridi-a hi an hmu thei a, en thlak reng a ni bawk. Kum 48 mi, Dr Afridi hi engemaw chen kal taah khan CIA-in a ruai nia sawi a ni a, Abbottabad-a in pakhatah Osama bin Laden-a a tawm ru nia hriat a nih khan hepatitis natna venna lama thawk nia insawiin Osama thisen hi a laksak a, amah ngei a ni tih, rintlak taka finfiahtu a ni ta a ni. Osama kah hlum a nih atanga chawlhkar thumah Dr Afridi hi man a ni a, thla tam tak thu zawh fiah a nih hnuah kumin May thla khan kum 33 tang tura tih a ni ta a, US sorkar chu he thuchhuakah hian a lungawi loh avangin, Pakistan a tanpuina tur sum pawh Afridi-a tan hun tura ruat, dollar mtd 33-in a titlem a ni.
————

Pakistan Supreme Court chuan rorel lai, Pakistan Peoples Party hruaitu pakhat chu ram pahnih khua leh tui nihna nei kawp a nih avangin Parliament member a nihna a paihsak lailawk leh ta a, hetiang avang bawk hian MP dang 5 pawh Parliament member an nihna a lo chawlhtir tawh bawk a ni. Chief Justice Iftikhar Chaudhry-a kaihhruai, Judge 3 awmna bench chuan PPP MP, Zahid Iqbal-a h MP a nihna a chawlhtir a, National Assembly Speaker hnena a thupek a hriattirnaah chuan, Iqbal-a hian Pakistan khua leh tui nihna chauh a nei tih court a hriattir hma chuan MP a nihna a chawlhsan tur a ni tih a ziak a, a khua leh tui nihna chungchangah hian Court a lungawi hunah MP a nihna hi pek kir leh theih a nih tur thu a sawi bawk. Hetianga Court-in thupek a chhuah tak fo avang hian PML-N MP, Jamil Awan chuan ram dang khua leh tui nihna a neih tel thu, Court-ah hian a puang a, mahse ani hi chu court hian a hrem nghal mai lova, thla thar ni 2-ah ngaihtuah leh a tum a ni.
————-

China ram chhimthlang lam, tlang rama lirnghingah mi 4 an thi a, mi dang za chuang an hliam. Lirnghing hi richter scale-ah 5.7 a tling a, Yunnan province-ah mi 3, Sichuan province-ah mi 1 an thi a ni. He lirnghin hun hi Inrinni zan tlai tawh takah khan a ni a, mi 102 an hliam nia hriat a ni a, an zinga 20 phei chu an na hle a ni. Lirnghinna hmunah hian a mamawhte hman atan puan in, rizai leh kawmawl lam chi tam tak thawn luh a ni a, hmun thenkhatah inbiak pawhna a chhiat avang leh, eng pekna pawh a chhiat nual avangin intanpui dan tur pawh hriat a har deuh niin an sawi. He lirnghing hi na lutuka sawi tur ni lo mah se, in engemawzat chu a sawi chim niin tualchhung thuneituten an sawi.
———–

China rama tlangval pakhat, England football team tantu ruh tak chuan Euro Championship khelh tan a nih atang khan hlah lovin inkhel zawng zawng, a zawnin zan 11 a en a, a tlaivar ziah a, a taksa-in a tlin loh avangin a thi nia thu dawn a ni. Amah hi mi hrisel pangngai tak, kum 26 mi, an Collee football team-ah pawl tel ve thin a ni a, Italy leh Ireland inkhelh zanah khan zing dar 5 thleng, beer in chungin a thiante nen an en a, a haw hnua a mu chu a harh lo hlen ta a ni. Doctor-te chuan he tlangval thih chhan hi a mut loh rei lutuk avang te, beer a in hnem lutuk avangte leh a awmna a vawh lutuk vang te niin an sawi a, a thisena thil thlum a tlem lutuk vang leh, a thisen inpek dan a muan lutuk vang niin an sawi bawk.
————–

You can leave a response, or trackback from your own site.

Leave a Reply

You must be logged in to post a comment.

Powered by WordPress | Designed by: video game | Thanks to seo services, seo service and Etiketten drucken